პოლიტიკა

რასაც `ნაციონალური მოძრაობა` მიმართავს, ეს არის უკიდურესად არადემოკრატიული - სოფო კილაძე

ადამიანის უფლებათა საპარლამენტო კომიტეტის თავმჯდომარემ, სოფო კილაძემ გუშინ ველისციხესთან განვითარებულ მოვლენებზე საუბრისას განაცხადა, რომ ოპოზიციის ქმედებები იყო არადემოკრატიული.

დეპუტატის განცხადებით, ოპოზიციის მხრიდან იყო სერიოზული პროვოკაციები.

„ჩვენ ვცხოვრობთ სამართლებრივ სახელმწიფოში. ის, რაც გუშინ ჩვენ ვიხილეთ, შეიცავდა სავარაუდო დანაშაულის ნიშნებს. ამიტომ, ამაზე უნდა ჰქონდეს რეაგირება სახელმწიფოს. არ არის ინდულგენცია რომელიმე პარტიის წევრობა, ან დეპუტატობა, კანონის წინაშე ყველა თანასწორია და უნდა მოეთხოვოს პასუხი. პოლიტიკური პარტიის წევრობა, "წამებულის მანტია" არ უნდა იყოს ინდულგენციის საგანი. რასაც "ნაციონალური მოძრაობა" მიმართავს, ეს არის უკიდურესად არადემოკრატიული. სიტყვის თავისუფლება, შეკრებებისა და გამოხატვის თავისუფლება გარანტირებულია, მაგრამ გუშინ რაც ვიხილეთ, ეს იყო სერიოზული პროვოკაციები",- განაცხადა კილაძემ.

გუშინ გურჯაანში, ველისციხესთან „ნაციონალური მოძრაობის“ აქციის მონაწილეები სამართალდამცველების მიერ გადაკეტილი გზის გახსნასა და თელავისკენ გადაადგილებას ცდილობდნენ, სადაც სალომე ზურაბიშვილის ინაუგურაცია იმართებოდა. პოლიციამ მათ ალტერნატიული გზა ყვარლის გავლით რამდენჯერმე შესთავაზა, რაზეც მომიტინგეებმა უარი განაცხადეს.

პოლიციასა და მომიტინგეთა შორის რამდენჯერმა მოხდა შეტაკება. აქციის მონაწილეებმა პოლიციის კორდონის ავტომობილების გარღვევა და პოლიციის ავტობუსის გადაბრუნება სცადეს, ასევე მომიტინგეთა ნაწილმა სამარტალდამცველთა ავტობუსს ქვები დაუშინა.

ინაუგურაციის შემდეგ, აქციის მონაწილეებმა თბილისში პარლამენტთან გადაინაცვლეს, სადაც კარვები გაშალეს.