პოლიტიკა

ქვასავით ჩლუნგი და ჯოჯოხეთურად ზარმაცი - დონალდ ტრამპი ყოფილ სახელმწიფო მდივანზე

აშშ-ის პრეზიდენტმა დონალდ ტრამპმა ყოფილ სახელმწიფო მდივანს, რექს ტილერსონს ჩლუნგი და ზარმაცი უწოდა. ამის შესახებ დონალდ ტრამპმა Twitter-ის საკუთარ გვერდზე დაწერა.

„მაიკ პომპეო დიდ საქმეს აკეთებს. ვამაყობ ამით. მისი წინამორბედს, რექს ტილერსონს კი არ ჰქონდა შესაბამისი მენტალური შესაძლებლობები. ის ქვასავით ჩლუნგი იყო და მისი მოშორება დროულად ვერ შევძელი. ის იყო ჯოჯხეთურად ზარმაცი”, – დაწერა აშშ-ის პრეზიდენტმა.

მანამდე ყოფილმა სახელმწიფო მდივანმა რექს ტილერსონმა ჰიუსტონში საჯარო გამოსვლისას განაცხადა, რომ სახელმწიფო დეპარტამენტში მუშაობის დროს მან არაერთხელ უთხრა დონალდ ტრამპს, რომ ზოგიერთი მისი მოთხოვნის შესრულება შეუძლებელი იყო, რადგან ეს კანონს და საერთაშორისო შეთანხმებებს ეწინააღმდეგებოდა.

„აშშ-ის პრეზიდენტი საკმაოდ არადისციპლინირებულია, არ უყვარს კითხვა. არ კითხულობს ანგარიშებს და დეტალების გარკვევა არ მოსწონს, ამის ნაცვლად ხშირად ამბობს -„ეს არის ის, რისიც მე მჯერა““, – განაცხადა რექს ტილერსონმა ჰიუსტონში სიტყვით გამოსვლისას.