სამართალი

,,ქურდულ სამყაროსთან“ დაკავშირებით ახალი ქმედებების კრიმინალიზაცია იგეგმება

"ქურდულ სამყაროსთან" დაკავშირებით ახალი ქმედებების კრიმინალიზაცია იგეგმება.

ცვლილებას "სისხლის სამართლის კოდექსი" ითვალისწინებს, რომლის ინიციატორი საქართველოს მთავრობაა, კერძოდ კი, შინაგან საქმეთა სამინისტროა.

კანონპროექტი პარლამენტშია ინიცირებული.

კანონპროექტის მიხედვით, სისხლისსამართლებრივად დასჯადი გახდება "ქურდული შეკრების" ორგანიზება ან მასში მონაწილეობა. აღნიშნულ დანაშაულზე სასჯელი იქნება თავისუფლების აღკვეთა ვადით 7-დან 10 წლამდე ჯარიმით ან უამისოდ.

თუ ეს ქმედება ჩადენილი იქნება "კანონიერი ქურდის" მიერ, სასჯელი იქნება თავისუფლების აღკვეთა ვადით 9-დან 15 წლამდე ჯარიმით ან უამისოდ.

სისხლის სამართლებრივად დასჯადი გახდება ასევე „ქურდული სამყაროს“ საქმიანობის მხარდაჭერა.
ნებისმიერი ქმედება ჩადენილი პირის მიერ, რომლისთვისაც ცნობილია „ქურდული სამყაროს“ საქმიანობის შესახებ და სურდა ან უშვებდა, რომ თავისი აქტიური ქმედებით ხელს უწყობდა „ქურდული სამყაროს“ საქმიანობის განხორციელებას, - დაისჯება თავისუფლების აღკვეთით ვადით სამიდან ექვს წლამდე, ჯარიმით ან უამისოდ.

იგივე ქმედება ჩადენილი სამსახურებრივი მდგომარეობის გამოყენებით, -დაისჯება თავისუფლების აღკვეთით ვადით ოთხიდან შვიდ წლამდე, ჯარიმით ან უამისოდ.

"ქურდული სამყაროს" საქმიანობის მხარდაჭერის შესახებ მუხლით გათვალისწინებულ დანაშაულს არ წარმოადგენს „ქურდული სამყაროს“ წევრისთვის ან/და „კანონიერი ქურდისთვის“ საკვების, ტანსაცმლის, რელიგიური დანიშნულების საგნის გადაცემა ან პირის სიცოცხლის შენარჩუნებისთვის აუცილებელი ქმედების განხორციელება, აგრეთვე საქართველოს კანონმდებლობით გათვალისწინებული პროფესიული/სამსახურებრივი მოვალეობის/საქმიანობის შესრულება.

ზეპირად, წერილობით ან გამოხატვის სხვა საშუალებით „ქურდული სამყაროს“ ან „ქურდული სამყაროს“ წევრის/„კანონიერი ქურდის“ საჯაროდ მხარდაჭერა ამ მუხლით ("ქურული სამყაროს" საქმიანობის მხარდაჭერა) გათვალისწინებულ დანაშაულს წარმოადგენს იმ შემთხვევაში, თუ ეს ქმნის „ქურდული სამყაროს“ საქმიანობის განხორციელების აშკარა, პირდაპირ და არსებით საფრთხეს.

სისხლისსამართლებრივი პასუხისმგებლობისგან თავისუფლდება ამ მუხლით ("ქურდული სამყაროს" საქმიანობის მხარდაჭერა) გათვალისწინებული დანაშაულის ჩამდენი პირი, თუ მან ამის თაობაზე ნებაყოფლობით განუცხადა სისხლის სამართლის პროცესის მწარმოებელ ორგანოს და მისი საგამოძიებო ორგანოებთან თანამშრომლობის შედეგად ირკვევა მძიმე ან განსაკუთრებით მძიმე დანაშულის ჩამდენი პირის ვინაობა, ან/და მისი უშუალო ხელშეწყობით შეიქმნა ასეთი დანაშაულის გახსნისათვის არსებითი პირობები, თუ მის ქმედებაში არ არის სხვა დანაშაულის ნიშნები.

ამ მუხლით ("ქურდული სამყაროს" საქმიანობის მხარდაჭრა) გათვალისწინებული ქმედებისათვის იურიდიული პირი დაისჯება ლიკვიდაციით ან საქმიანობის უფლების ჩამორთმევით და ჯარიმით.

კანონპროექტის თანახმად, სისხლისსამართლებრივად დასჯადი გახდება „ქურდული სამყაროს“ წევრისთვის/„კანონიერი ქურდისთვის“ მიმართვა.

პირის მიერ „ქურდული სამყაროს“ წევრისთვის/„კანონიერი ქურდისთვის“ მიმართვა „ქურდული გარჩევის“, ან მის ან სხვა პირის სასარგებლოდ ნებისმიერ პირზე ან ნებისმიერი პირის გადაწყვეტილების მიღებაზე არამართლზომიერი ზეგავლენის მოხდენის მიზნით, მიუხედავად იმისა, განხორციელდა თუ არა „ქურდული სამყაროს“ წევრის/„კანონიერი ქურდის“ მიერ რაიმე ქმედება ან/და დადგა თუ არა ამ პირისთვის სასურველი შედეგი, – დაისჯება თავისუფლების აღკვეთით ვადით სამიდან შვიდ წლამდე, ჯარიმით ან უამისოდ.

იგივე ქმედება, რამაც გამოიწვია მძიმე შედეგი, -დაისჯება თავისუფლების აღკვეთით ვადით ოთხიდან რვა წლამდე, ჯარიმით ან უამისოდ.

სისხლის სამართლებრივი პასუხისმგებლობისგან გათავისუფლდება "ქურდული სამყაროს" წევრისთვის/ "კანონიერი ქურდისთვის" მიმართვის მუხლით გათვალისწინებული დანაშაულის ჩამდენი პირი, თუ მან ამის თაობაზე ნებაყოფლობით განუცხადა სისხლის სამართლის პროცესის მწარმოებელ ორგანოს და მისი საგამოძიებო ორგანოებთან თანამშრომლობის შედეგად ირკვევა მძიმე ან განსაკუთრებით მძიმე დანაშულის ჩამდენი პირის ვინაობა, ან/და მისი უშუალო ხელშეწყობით შეიქმნა ასეთი დანაშაულის გახსნისათვის არსებითი პირობები, თუ მის ქმედებაში არ არის სხვა დანაშაულის ნიშნები.

ნინო ექვთიმიშვილი