პოლიტიკა

ქართველებისა და სომხების წინააღმდეგ წარმოუდგენელი დანაშაულია ჩადენილი - შალვა ნათელაშვილი

„ლეიბორისტული პარტიის“ ლიდერის, შალვა ნათელაშვილის განცხადებით, „ადგილობრივი არჩევნების მასობრივ გაყალბებასთან ერთად, ჩადენილია სამშობლოს ღალატის უპრეცედენტო ფაქტი“.

როგორც ნათელაშვილმა ბრიფინგზე აღნიშნა, “ივანიშვილ-ბოკერია-თარხან-მოურავის ალიანსი გაურიგდა ახალქალაქსა და ნინოწმინდაში მოქმედ სეპარატისტულ ორგანიზაციებს“.

„ხმების სანაცვლოდ, დღეს სამველ პეტროსიანის ჯგუფი, რომლის მიზანია ამ კუთხის საქართველოდან სამუდამოდ მოწყვეტა - ოფიციალურად მოღვაწეობს ადგილობრივ თვითმმართველობის ორგანოებში. ამას შეიძლება მოყვეს განუსაზღვრელი შედეგები ჩვენი ქვეყნის ტერიტორიული მთლიანობისათვის.

ჩვენ გვაქვს, სამწუხაროდ, პრეცედენტი აფხაზეთში, როდესაც სეპარატისტული მოძრაობა დაიწყო სწორედ სომეხთა კულტურულ-საქველმოქმედო ორგანიზაციამ. როდესაც აფხაზებს იქაურ თვითმმართველობებში უმრავლესობა მივეცით არძინბას მეთაურობით და მერე როგორ გამოგვიცხადეს დამოუკიდებლობა და როგორ წამოიწყეს ომი, ვიცით. იგივეს ვაკეთებთ ახლა ჯავახეთში, რომელიც ისედაც დაძაბულობით ხასიათდება.

მთელი ეს დანაშაულებრივი სქემა მიმართულია ქართველი ხალხის წინააღმდეგ. შეთანხმება მოსკოვში მოღვაწე სომხური სეპარატისტული ორგანიზაცია „ჯავახის“ლიდერ არაბიანთან მოხდა, რუსეთის სპეცსამსახურების მონაწილეობით და თამადობით. მომხდარია, ქართველებისა და სომხების წინააღმდეგ წარმოუდგენელი დანაშაული.

მოვუწოდებ, ცენტრალურ საარჩევნო კომისიას, თუ შერჩენიათ პატრიოტიზმის ნატამალი და ადამიანობის ელემენტები, შეიკრიბონ და თვითონ გააუქმონ სრულიად გაყალბებული არჩევნების შედეგები“,-აღნიშნა პოლიტიკოსმა.

მონიკა დავლიანიძე