პოლიტიკა

„ქართულმა ოცნებამ` მრავალი წელი დაკარგა უმოქმედობით, ეს სიცოცხლის ფასად დაუჯდა ტატუნაშვილსა და საქართველოს არაერთ მოქალაქეს - სალომე სამადაშვილი

„ერთიანი ნაციონალური მოძრაობის“ წევრის, სალომე სამადაშვილის შეფასებით, საპარლამენტო უმრავლესობის ინიციატივა, რომ პარლამენტმა არჩილ ტატუნაშვილის დაღუპვასთან დაკავშირებით რეზოლუცია მიიღოს, დაგვიანებულია.

დეპუტატის თქმით, „ქართულმა ოცნებამ“ დრო დაკარგა, რასაც ტატუნაშვილი შეეწირა.

„სამწუხაროდ, რეზოლუციის მოთხოვნა საკმაოდ დაგვიანებულია. წლების წინ უნდა დაწყებულიყო ზეწოლის გაძლიერება საერთაშორისო თანამეგობრობაზე, რომ ტერიტორიებზე მისიის დაშვება მომხდარიყო. ამის ნაცვლად „ქართულმა ოცნებამ" მრავალი წელი დაკარგა უმოქმედობით, რის შედეგადაც ჩვენი ოკუპაციის თემატიკა ფაქტობრივად, გაქრა საერთაშორისო დღის წესრიგიდან. ეს სიცოცხლის ფასად დაუჯდა ტატუნაშვილსა და საქართველოს არაერთ მოქალაქეს", - განაცხადა სამადაშვილმა.

უმრავლესობის ლიდერის, არჩილ თალაკვაძის განცხადებით, ისინი რეზოლუციით მოითხოვენ საერთაშორისო გამოძიების ჩატარებას.