პოლიტიკა

„ქართულმა ოცნებამ“ მოახერხა, რომ ვენეციის კომისიაშიც მოჭრა თავი ქვეყანას - დავით უსუფაშვილი

საქართველოს პარლამენტის ყოფილი თავმჯდომარის, მოძრაობა „შენების საქართველოს“ ლიდერის, დავით უსუფაშვილის განცხადებით, „ქართულმა ოცნება“ მოახერხა და ვენეციის კომისიაშიც მოჭრა თავი ქვეყანას.

მისი თქმით, მისთვის ცნობილია, რომ ვენეციის კომისიაში არანაკლებ შფოთავენ იმის, გამო რაც ბოლო სამი დღის განმავლობაში საკონსტიტუციო ცვლილებებთან დაკავშირებთ ხდება.

ამის შესახებ უსუფაშვილმა „ტვ პირველის“ ეთერში განაცხადა.

მისი თქმით, პროცესი იქეთ მიდის, რომ მივიღებთ ერთი პარტიის კონსტიტუციას, რომელიც იქნება მნიშვნელოვნად ნაკლული დოკუმენტი, ვიდრე ჩვენ გვქონდა 1995 წლიდან- დღემდე.

„მაშინდელი კონსტიტუცია მაინც ასრულებდა ქვეყნის, ერის, ფუნდამენტის ფუნქციას. ერთადერთ საკითხზე „ქართულ ოცნებას“ რომ გადაედგა ის ნაბიჯი, რომელიც თავიდანვე გამოაცხადა, და ეს იყო საპარლამენტო საარჩევნო სისტემა, მაშინ ამ კონსტიტუციას და ამ პროცესს ექნებოდა არა სრული, მაგრამ უდიდესი უმრავლესობის მხარდაჭერა პარლამენტშიც და პარლამენტს გარეთაც. ანუ ერთ საკითხს გადააყოლა “ქართულმა ოცნებამ“ ყველაფერი.

მიუხედავად იმისა, რომ ცალკეულ დებულებებთან, ცალკეულ საკითხებთან მიმართებით, იგივე, პრეზიდენტის უფლებამოსილებების თემა, ეროვნული უშიშროების საბჭოს საკითხი, ადამიანის უფლებებთან დაკავშირებული თემები, რომლების მიმართ იყო განსხვავებული მოსაზრებები, ერთი საკითხის სწორად გადაჭრის შემთხვევაში, ამ კონსტიტუციის ტექსტს ექნებოდა გაცილებით ფართო მხარდაჭერა“,-განაცხადა დავით უსუფაშვილმა.

პარლამენტის ყოფილი თავჯდმოარე მიიჩნევს, რომ „ქართულმა ოცნებამ“ პროცესი პოლიტიკურად არასწორად წაიყვანა.

„თავიდან გასცა იმ ტიპის დაპირებები, გააჩინა იმ ტიპის მოლოდინები, რომელიც საზოგადოებისთვის იყო ცნობილი, პროპორციული სისტემის შიგნით დახვეწაზე მიდიოდა მსჯელობა.

„ოცნებამ“ მოახერხა, რომ ვენეციის კომისიაშიც მოჭრა თავი ქვეყანას. იმიტომ რომ ვენეციის კომისიამ დასკვნა დადო იმ ტექსტზე, რომელიც მას ედო წინ. ვენეციის კომისიის დასკვნის 20 გვერდიდან - 6 გვერდი ეთმობა სწორედ პროპორციული სისტემის ბონუსური მოდელის გამართვის და გაკეთილშობილების მცდელობას.

მე ეს ვიცი და ამას ჰაერზე არ ვსაუბრობ, რომ ვენეციის კომისია არანაკლებ არის შეშფოთებული იმ განვითარებით რაც ბოლო სამ დღეში მოხდა, ანუ ვენეციიდან სანამ ქუთაისში ჩავიდა ეს ხალხი, მან შეცვალა ყველაფერი ამ კონკრეტულ საკითხში. ყველასთვის ნათელი იყო, რომ ეს საკითხი იყო გასაღები სხვა თემებზე კონსენსუსის მოძებნისთვის“,-განაცხადა უსუფაშვილმა.

მონიკა დავლიანიძე