სამართალი

ქართული წარმოშობის 325 კანონიერი ქურდია დარეგისტრირებული - შალვა ხუციშვილი

საქართველოს შინაგან საქმეთა მინისტრის, შალვა ხუციშვილის ინფორმაციით, ქართული წარმოშობის 325 კანონიერი ქურდია დარეგისტრირებული, რომელთა ძალიან მცირე ნაწილი საქართველოში, საპყრობილეში იმყოფება, დანარჩენი - პოსტსაბჭოთა სივრცესა და ევროკავშირის ქვეყნებში.

შალვა ხუციშვილმა აღნიშნულ საკითხზე "საქართველოსა და ევროპის პოლიციის სამსახურს შორის ოპერატიული და სტრატეგიული თანამშრომლობის შესახებ" შეთანხმების ფარგლებში ისაუბრა, რომელიც საპარლამენტო კომიტეტებს წარუდგინა.

,,ყველაზე მაღალი ხელშეკრულება გავაფორმეთ, რაც შეიძლება ევროკავშირის არაწევრ ქვეყანას შეიძლება ჰქონდეს. ეს დიდ შესაძლებლობას გვაძლევს, რათა ევროპის პოლიციის სამსახურთან თანამშრომლობა გავაღრმავოთ. კონკრეტულად, ევროპული ქვეყნების პოლიციებთან. ეს მიუთითებს იმაზე, რომ ჩვენ საკმაოდ მაღალი სტანდარტი გვაქვს, რადგან ევროპასთან ასეთი ტიპის ხელშეკრულებები გაფორმებული აქვთ ამერიკას, ნორვეგიას, შვეიცარიას. ანუ, მათ, ვისაც მაღალი საპოლიციებო სტანდარტები აქვთ. ქართული წარმოშობის 325 კანონიერი ქურდია დარეგისტრირებული, რომელთა ძალიან მცირე ნაწილი საქართველოში, საპყრობილეში იმყოფება, დანარჩენი - პოსტსაბჭოთა სივრცესა და ევროკავშირში. როცა ერთ ქვეყანაში უკანონო შემოსავლების მიღება ხდება, მეორე ქვეყანაში ამის გათეთრება, ევროპოლთან შეთანხმება შესაძლებლობას გვაძლევს, რომ ეს სურათი სრულად დავინახოთ და ლოკალურად კონკრეტულ ქვეყნებთან არ ვიმუშაოთ, რომლებთანაც ისედაც ვთანამშრომლობთ," - განაცხადა ხუციშვილმა.

შს მინისტრის მოადგილის მტკიცებით, საქართველოში ორგანიზებული დანაშაული, როგორც ეს ევროპული სტანდარტებითაა შეფასებული, მინიმალურ დონეზეა.

რაც შეეხება ე.წ. ფარული პოლიციელების ინსტიტუტის ამოქმედებას, ხუციშვილის ცნობით, ძალოვანი უწყება მთავრობას შესაბამისი ინიციატივით მიმდინარე თვეში მიმართავს, რომ პროექტის განხილვა და ინიცირება მოხდეს.

ნინო ექვთიმიშვილი