პოლიტიკა

„ქართული ოცნებისა“ და „პატრიოტთა ალიანსის“ ჯავახეთის რეგიონის სიაში სეპარატისტული დაჯგუფებაა შეყვანილი - შალვა ნათელაშვილი

„ლეიბორისტული პარტიის“ თავმჯდომარის შალვა ნათელაშვილის ინფორმაციით,“ქართული ოცნებისა“ და „პატრიოტთა ალიანსის“ ჯავახეთის რეგიონის პარტიულ სიაში სეპრატისტთა ჯგუფია შეყვანილი.

ნათელაშვილმა ბრიფინგზე „ქართულ ოცნებას“ და „პატრიოტთა ალიანსს“ მოუწოდა, ნინოწმინდასა და ახალქალაქში პარტიული სიები გააუქმონ.

„ივანიშვილი ყიდის ჯავახეთს. ივანიშვილის რეჟიმს, ერევანსა და მოსკოვს შორის მიღწეული შეთანხმებით, ამ რეგიონში არსებული ხმები მხოლოდ ორ პარტიას შორის გაიყოფა. ესენი არიან- კრიმინალური „ქართული ოცნება“ და უცხოური სპეცსამსახურებიდან დაფინანსებული „პატრიოტთა ალიანსი“. მათ სიებში შეყვანილია მთელი ჯავახური სეპარატისტული დაჯგუფება სამველ პეტროსიანის მეთაურობით, რომელთა მიზანია, ჯერ რეგიონის კულტურული ავტონომია გამოაცხადონ, შემდეგ პოლიტიკური ავტონომია და საბოლოო ჯამში, ტერიტორია დედა საქართველოს ჩამოაცალონ. ორივე პარტიას მოვუწოდებ, პარტიული სიები ნინოწმინდასა და ახალქალაქში გააუქმონ და საქართველოს მოქალაქე სომხებს საშუალება მისცენ, გარიგების გარეშე თავისი აზრი გამოხატონ და მხარი იმ პარტიას დაუჭირონ, რომლებიც მათ ხედვებთან ახლოს არიან“,- აღნიშნა პოლიტიკოსმა.

მონიკა დავლიანიძე