პოლიტიკა

,,ქართული ოცნების’’ ცენტრალურ ოფისში პრემიერი პარტიის ლიდერებს შეხვდა

,,ქართული ოცნების’’ ცენტრალურ ოფისში პრემიერისა და პარტიის ლიდერების გაფართოებული შეხვედრა დასრულდა.

როგორც შეხვედრის დასრულების შემდეგ ჟურნალისტებს ვიცე-პრემიერმა, დიმიტრი ქუმსიშვილმა განუცხადა, შეკრებაზე საორგანიზაციო საკითხებზე განიხილებოდა და ითქვა ის, რომ მთავრობამ და პარლამენტმა კოორდინირებულად უნდა იმუშაონ.

თავის მხრივ, შეხვედრის კიდევ ერთმა მონაწილემ, ჯანდაცვის მინისტრმა, დავით სერგეენკომ აღნიშნა, არ ყოფილა განხილვები მთავრობის წევრების კანდიდატებთან დაკავშირებით. მისივე ინფორმაციით, თანამდებობის გადანაწილებასთან დაკავშირებით სავარაუდოდ, პოლიტსაბჭოს ფორმატში კონსულტაციები მიმდინარეობს, თუმცა როგორც სერგეენკო აცხადებს, თავად ამ პროცესში არ მონაწილეობს.

ის, რომ დღევანდელ შეხვედრაზე საკადრო ცვლილებებზე საუბარი არ ყოფილა, დაადასტურა ,,ქართული ოცნების’’ კიდევ ერთმა წევრმა, გიორგი კახიანმა.

მისი ინფორმაციით, განიხილეს ბიუჯეტის პარამეტრები და ორგანიზაციული საკითხები.

ნინო ექვთიმიშვილი