პოლიტიკა

„ქართული ოცნების“ შემოხაზვით მიხეილ სააკაშვილის დაბრუნდების შანსს ზრდით - ნინო ბურჯანაძე მოსახლეობას

„დემოკრატიული მოძრაობის“ ლიდერმა ნინო ბურჯანაძემ გააფრთხილა ამომრჩეველი, რომ მიხეილ სააკაშვილის დაბრუნების შიშის მიუხედავად ხმა არ მისცენ „ქართულ ოცნებას“. ბურჯანაძის განმარტებით, ადგილობრივი თვითმმართველობის არჩევნებში მმართველი გუნდის გამარჯვებით სააკაშვილის დაბრუნების შანსები მხოლოდ გაიზრდება.

„თუ კიდევ ამ პროვოკაციას წამოეგება საქართველოს მოსახლეობა, რომ ოღონდ მიშა არ მობრუნდეს და „ქართულ ოცნებას“ მისცემს ხმას, თითოეული ეს ადამიანი, ვინც „ქართულ ოცნებას“ ამ ნიშნით შემოხაზავს, უზრუნველყოფს სააკაშვილის ჩამოსვლისთვის კიდევ ერთი აგურის დადებას. იმიტომ რომ, როგორი უუნარო და უსუსური იყო გუშინ საზღვარზე უკრაინის ხელისუფლება, იმაზე უარესად უსუსურია დღევანდელი ქართული მთავრობა. და ის ადამიანები, ვინც დღეს არიან ხელისუფლებაში, ვერაფერს ვერ გააკეთებენ იმისათვის, რომ სააკაშვილის გეგმებს ხელი შეუშალონ“, -თქვა ბურჯანაძემ.

„დემოკრატიული მოძრაობის“ ლიდერის მტკიცებით, მიხეილ სააკაშვილის უკან დგას ძალიან დიდი ძალა და უკრაინაში მისი დაბრუნება დიდი პროექტის ნაწილია, რომელშიც, შესაძლოა, საქართველოც იყოს ჩართული.

ანა მებურიშვილი