პოლიტიკა

„ქართული ოცნება` უკანონობაზე უკანონობას ამატებს - გიორგი ვაშაძე დავით კირკიტაძის საქმეზე

„მუხლი, რომელიც დავით კირკიტაძეს შეეფარდა, აბსოლუტურად არაადეკვატურია და არ შეესაბამება იმ ქმედებას, რაც იმ შემთხვევაში იყო. ჩვენ ვითხოვთ დავით კირკიტაძის პასუხისმგებლობისგან გათავისუფლებას, რადგან მის ქმედებაში არ იყო სისხლის სამართლის დანაშაული“, - ამის შესახებ გაერთიანებული ოპოზიციის წევრმა გიორგი ვაშაძემ ჟურნალისტებს გურჯაანის რაიონულ სასამართლოსთან განუცხადა.

მისივე თქმით, საქართველოში შერჩევითი სამართალი მოქმედებს.

„ „ქართული ოცნება" უკანონობაზე უკანონობას ამატებს. ჩვენს მხარდამჭერებზე თავდამსხმელებიც დააკავეს თურმე და რომელი მუხლით? ცემის მუხლით. მწვანე ავტობუსზე შეხტომა უფრო დიდი დანაშაულია, ვიდრე ადამიანის ყბების დალეწვა? ეს არის ზუსტად ის შერჩევითობა და უკანონობა, რაც დღეს ქვეყანაში არის. ნაცვლად იმისა, რომ 6 ადამიანი დაეკავებინათ, 3 დააკავეს. ჩვენ ყველა გვყავს იდენტიფიცირებული.

ეს არის უკანონობა და ჩვენ აუცილებლად დავაბრუნებთ „ქართულ ოცნებას" კონსტიტუციური კანონის ფარგლებში. ყველა ამ ფაქტზე ვაკეთებთ პარალელურ გამოძიებას. ყველა სამართალდამრღვევს, რომელსაც დღეს შსს-ის ფორმა აცვია, მივცემთ სისხლისსამართლებრივ პასუხისგებაში. მწვანე ავტობუსებით გზებით გადაკეტვას შესაბამისი საკანონმდებლო ბაზისი სჭირდება. როცა ამას უკანონოდ აკეთებ, რა თქმა უნდა, შესაბამის პასუხს მიიღებენ", - განაცხადა ვაშაძემ.

ვაშაძის განმარტებით, ისინი უკან დახევას არ აპირებენ და სიმართლის დასადგენად ბოლომდე იბრძოლებენ.

„ვერ მიაღწევენ იმას, რომ რაიმე შემთხვევაში უკან დავიხევთ. ჩვენსკენ არის სიმართლე და სიმართლე ყოველთვის გაიმარჯვებს.

„სისხლის სამართლის კოდექსი“ წაიკითხოს ყველამ და არ ეგონოს ვინმეს, რომ პოლიციის უნიფორმა მას უკანონო ქმედებისგან გადაარჩენს", - აღნიშნა ვაშაძემ.

გაერთიანებული ოპოზიციის ერთ-ერთ ლიდერ დავით კირკიტაძეს, რომელიც ორი დღის წინ 16 დეკემბერს განვითარებული მოვლენების შედეგად დააკავეს, თელავის პოლიციის იზოლატორში ბრალი ოფიციალურად წარუდგინეს. ის ამ დრომდე არ გადაუყვანიათ გურჯაანის რაიონულ სასამართლოში, სადაც გაერთიანებული ოპოზიციის "ძალა ერთობაშიას" ლიდერები და მხარდამჭერები არიან შეკრებილები და ისინი დავით კირკიტაძის გათავისუფლებას მოითხოვენ.

დავით კირკიტაძეს გამოძიება ველისციხეში გამართულ აქციაზე პოლიციელზე თავდასხმისთვის, ფიზიკური შეურაცხყოფისა და ქონების დაზიანებისთვის სისხლის სამართლის კოდექსის 353-ე პრიმა მუხლით ედავება.