პოლიტიკა

„ქართული ოცნება“ თვითმმართველობის არჩევნების მასობრივ გაყალბებას გეგმავს - შალვა ნათელაშვილი

„ლეიბორისტული პარტიის“ თავმჯდომარემ, შალვა ნათელაშვილმა მოუწოდა საქართველოს პრეზიდენტს, თვითმმართველობის არჩევნები ოქტომბრის ბოლოსთვის დანიშნოს. ნათელაშვილმა აღნიშნა, რომ ამით „ქართული ოცნება“ არჩევნებს ვერ გააყალბებს. მმართველი გუნდი არჩევნების ჩატარებას ოქტომბრის შუა რიცხვებში აპირებს.

„მივმართავ პრეზიდენტს, რომელიც არის კანონიერებისა და სამართლიანობის გარანტი კონსტიტუციით და რომელიც ნიშნავს ამ არჩევნებს, ადგილობრივი თვითმმართველობის არჩევნები დანიშნეთ ოქტომბრის ბოლო რიცხვებში. ეს იქნება უზარმაზარი დარტყმა რეჟიმის იმ მეოცნებეებზე, რომლებიც ამზადებენ არჩევნების შედეგების მასობრივ ფალსიფიცირებას“, - განაცხადა ნათელაშვილმა დღევანდელ ბრიფინგზე.

ნათელაშვილმა საკონსტიტუციო პროექტს გამოეხმაურა და თქვა, რომ ხელისუფლება შემუშავებულ ცვლილებებს საბოლოო დოკუმენტში ვერ შეიტანს

„მიდის ხელისუფლების უზურპაცია მრავალი წლით და თავიანთი ჭკუით სამუდამოდ, მაგრამ მათ ვპირდებით, რომ ძალიან მალე შეიცვლება ეს ხელისუფლება შეტანილი ძირითად კანონში იქნება გაუქმებული, ხოლო ამ ცვლილებების ხმის მიმცემი სუბიექტები, ფულის მაძიებლები, ქვეყნის მოღალატენი, მორალურ და იურიდიულ პასუხისგებაში იქნებიან მიცემული“, - თქვა ნათელაშვილმა.

ანა მებურიშვილი