პოლიტიკა

„ქართული ოცნება“ „ევროპულ საქართველოს“ სასათბურე პირობებს უქმნის - კახა კუკავა

„დემოკრატიული მოძრაობის“ თბილისის მერობის კანდიდატის კახა კუკავას განცხადებით, ხელისუფლება პარტია „ევროპულ საქართველოს“ სასათბურე პირობებს უქმნის.

როგორც კახა კუკავამ ბრიფინგზე აღნიშნა, აუდიტის სამსახურის მონაცემებით „ევროპულ საქართველოს“ ძალიან ბევრი შემოწირულობა აქვს მიღებული.

„აუდიტის სამსახურის ბოლო თვის მონაცემებით, სულ შემოწირულობები პოლიტიკურმა პარტიებმა 4 800 000 ლარის ოდენობით მიიღეს, საიდანაც 4 500 000, 93% მმართველმა პარტიამ, ხოლო 287 000, ანუ 6%-მდე „ევროპულმა საქართველომ“ მიიღო. ყველა დანარჩენმა პარტიამ ერთად 25 000 ლარი, ანუ 0,2% მიიღო. ეს მაჩვენებელი ასახავს იმას, თუ რეალურად ქვეყანაში არსებული ბიზნეს სექტორის პირობებში, რომელი პარტიების დაფინანსებას ბედავს ბიზნესი. აღსანიშნავია ისიც, რომ როგორც „ქართული ოცნების“, ისე „ევროპული საქართველოს“ ერთ-ერთი მთავარი შემომწირველი არის დავით კეზერაშვილი, რომლის კუთვნილი სარეკლამო კომპანიამ, მთელი სარეკლამო ფართი „ქართულ ოცნებაზე“ და „ევროპულ საქართველოზე“ გადაანაწილა.

გარე რეკლამებში ყველგან ხელისუფლება იყურება დაფებიდან და მეორე ნაწილი არის დათმობილი „ქართული ოცნების“ სატელიტი პარტიის „ევროპული საქართველოს“ კანდიდატებისათვის. არც ერთი სხვა პარტიისთვის არ არის სარეკლამო ადგილები გამოყოფილი ქალაქის არც ერთ ბილბორდზე და არც რეგიონებში“,-აღნიშნა კუკავამ.

მონიკა დავლიანიძე