პოლიტიკა

,,ქართული ოცნება - დემოკრატიული საქართველო’’ სოფელ ურაველში მომხდარი ფიზიკური დაპირისპირების გამო შეშფოთებას გამოთქვამს

„ქართული ოცნება-დემოკრატიული საქართველოს“ პრესსამსახური ახალციხის მუნიციპალიტეტის სოფელ ურაველში მომხდარი ფიზიკური დაპირისპირების ფაქტს ეხმიანება.

,,გვსურს, გამოვეხმაუროთ ახალციხის მუნიციპალიტეტის სოფელ ურაველში მომხდარი ფიზიკური დაპირისპირების ფაქტს.

პარტია "ქართული ოცნება-დემოკრატიული საქართველო" მომხდარის გამო, შეშფოთებას გამოთქვამს და ვინც უნდა იყოს დაპირისპირების მხარე, ძალადობის ყოველგვარ ფაქტს კატეგორიულად გმობს.

მოვუწოდებთ სამართალდამცავ ორგანოებს, სამართალდარღვევის ფაქტზე დროული რეაგირება მოახდინონ. ასევე, მოვუწოდებთ პოლიტიკურ პარტიებს, მსგავსი ფაქტები პოლიტიკური მიზნებისთვის არ გამოიყენონ’’, - ნათქვამია განცხადებაში.

ცნობისათვის, ნაციონალური მოძრაობის” ლიდერის, ნიკა მელიას ინფორმაციით, ახალციხის რაიონის სოფელ ურაველში ”ნაციონალური მოძრაობის” წარმომადგენელს და მისი ოჯახის წევრებს ,,ქართული ოცნების” მაჟორიტარი დეპუტატის ბიუროს უფროსი, გუბერნიის და გამგეობის თანამშრომლები ფიზიკურად გაუსწორდნენ.

მისი თქმით, ამავე რაიონში ”ქართული ოცნების” მაჟორიტარობის კანდიდატის გიორგი კოპაძის ბიუროს უფროსმა ზაზა გელაძემ და გამგეობის და გუბერნიის თანამშრომლებმა სასტიკად სცემეს ჩვენი წარმომადგენელი ბეგლარ კაპანაძე, მისი 80 წლის მამა ნოდარ კაპანაძე და 23 წლის შვილი ზურაბ კაპანაძე. 23 წლის ბიჭი მძიმე მდგომარეობაში საავადმყოფოშია მოთავსებული.