პოლიტიკა

ქართული მოსახლეობა პოლიტიკოსებს უკვეთავს ევროატლანტიკურ არჩევანს, მეტ დემოკრატიას, მედიის მეტ თავისუფლებასა და უფრო ხარისხიან სასამართლოს - პრეზიდენტი

საქართველოს პრეზიდენტმა, გიორგი მარგველაშვილმა ნატოს საპარლამენტო ასამბლეის საგაზაფხულო სესიაზე კონსტიტუციაში დაგეგმილ ცვლილებებზე ისაუბრა.

როგორც პრეზიდენტმა აღნიშნა, მოსახლეობის დაკვეთაა ევროატლანტიკური არჩევანი, სასამართლო რეფორმა, მედიათავისუფლებისა და დემოკრატიის გაძლიერება. მისი აზრით, პოლიტიკოსებმა ეს მოთხოვნები „ყოველდღიურ ცხოვრებაში უნდა გადაიტანონ“.

„ქართული საზოგადოება პოლიტიკოსებს ნათლად უკვეთავს ევროატლანტიკურ არჩევანს, მეტ დემოკრატიას, მედიის მეტ თავისუფლებას, უფრო ხარისხიან სასამართლოს და ყოველივე ეს უმნიშვნელოვანესია, რომ გატარდეს ყოველდღიურ ცხოვრებაში“,- განაცხადა გიორგი მარგველაშვილმა.

მარგველაშვილის შეფასებით, ქვეყნის პოლიტიკა იმისკენაა მიმართული, რომ სტაბილურობის გარანტი გახდეს რეგიონში, რისთვისაც დემოკრატიისა და ეკონომიკის გაძლიერებაა საჭირო.

„დღეს ჩვენ ვახორციელებთ უაღრესად სტაბილურ და რაციონალურ პოლიტიკას იმისთვის, რომ არ გავამწვავოთ კრიზისი და რეგიონისთვის ვიყოთ სტაბილურობის შემომტანი და გარანტი. ამ თვალსაზრისით, დემოკრატიის, ეკონომიკური გაძლიერების, თავისუფალი საზოგადოების მშენებლობა ნამდვილად ქმნის იმ ფონს, რომელზეც საქართველო აძლევს შესაძლებლობას რეგიონს, რომ უფრო მშვიდობიანად განვითარდეს. რა თქმა უნდა, ქართულ საზოგადოებას კიდევ უფრო მეტი გამოწვევა აქვს. საჭიროა ჩვენს საზოგადოებაში შედგეს სიღრმისეული დიალოგი და თანხმობა, რომ ჩვენ რეალურად შევქმნათ ევროპული დემოკრატია. კულტურულად ევროპულ ერს გვჭირდება, რომ ეს გადავიტანოთ პოლიტიკურ სისტემებში“, - განაცხადა პრეზიდნეტმა.

შეგახსენებთ, 26 მაისიდან თბილისში ნატოს საპარლამენტო ასამბლეის საგაზაფხულო სესია იმართება, რომელიც დღეს დასრულდება.

ანა მებურიშვილი