პოლიტიკა

ქართული მხარე დაგვპირდა, რომ დეტალურად და სრულყოფილად გამოიძიებს აფგან მუხთარლის ირგვლივ განვითარებულ გარემოებებს - იან კელი

საქართველოში აშშ-ის ელჩის იან კელის განცხადებით, ქართული მხარე დაპირდა, რომ დეტალურად და სრულყოფილად გამოიძიებს აზერბაიჯანელი ჟურნალისტისა და აქტივისტის, აფგან მუხთარლის საქმეს.

„ეს არის ნამდვილად სერიოზული ბრალდებები. ჩვენ, რა თქმა უნდა, გვქონდა კონტაქტი საქართველოში თანამდებობის პირებთან, რომლებიც დაგვპირდნენ, რომ დეტალურად და სრულყოფილად გამოიძიებენ აფგან მუხთარლის ირგვლივ განვითარებულ გარემოებებს“, - უთხრა კელიმ ჟურნალისტებს.

კელი ასევე გამოეხმაურა ბრალდებებს, რომელიც ისმის ქართველი სამართალდამცავი ორგანოების მისამართით. ელჩის თქმით, ის დაარწმუნეს, რომ საქართველო თბილისში მცხოვრები აზერბაიჯანელი მოქალაქეებისა და უფლებადამცველების უფლებებს დაიცავს.

„ვფიქრობ, ისინი სრულიად აცნობიერებენ ბრალდებების სერიოზულობას, მათ დაგვარწმუნეს, რომ თბილისში მცხოვრები აზერბაიჯანელი მოქალაქეებისა და უფლებადამცველების უფლებები იქნება დაცული და მთავრობა დიდ ყურადღებას აქცევს მათ უსაფრთხოებას“, - განაცხადა კელიმ.

აზერბაიჯანელი ჟურნალისტი აფგან მუხთარლი 29 მაისს გაუჩინარდა. მომდევნო დღეს
კი გავრცელდა ინფორმაცია, რომ ჟურნალისტი ბაქოს სახელმწიფო საზღვრის სამსახურის საგამოძიებო განყოფილებაში იმყოფებოდა. მუხთარლი აზერბაიჯანის საზღვარზე უკანონოდ გადაკვეთისა და დეკლარაციის გარეშე დიდი ოდენობით თანხის გადატანის ბრალდებით დააკავეს.

აზერბაიჯანის გენერალური პროკურატურის განცხადებით, მუხთარლიმ საზღვარი პასპორტის გარეშე გადაკვეთა.

31 მაისს მუხთარლის სასამართლო პროცესი გაიმართა. მას სამთვიანი წინასწარი პატიმრობა შეეფარდა. მას ბრალი წაუყენეს სამი მუხლით: საზღვრის უკანონოდ გადაკვეთა, კონტრაბანდა და სამართალდამცავებისათვის წინააღმდეგობის გაწევა.

ანა მებურიშვილი