პოლიტიკა

„ქართული მარში“ რუსთავი 2-ის პარალიზებას გეგმავს

„ქართული მარში“ ფართომასშტაბიან აქციას აანონსებს და რუსთავი 2-ის პარალიზებით იმუქრება. „ქართული მარშის“ სათათბიროს წევრის, კოკა მორგოშიას თქმით, არხის პარალიზება იქამდე გაგრძელდება, სანამ გიორგი გაბუნია ბოდიშს არ მოიხდის.

„უახლოეს დღეებში დაიგეგმება აქცია, სადაც ათი ათასობით ქართველი გამოვა და პირდაპირ პარალიზებას მოახდენს „რუსთავი 2“-ის. „რუსთავი 2“-ის ჟურნალისტებს არ მიეცემათ საშუალება არც ჩართვის, არც მუშაობის, ვიდრე გიორგი გაბუნია ცინიკური განცხადების გამო არ გამოვა და ბოდიშს არ მოიხდის, რასაც საქართველოს მოსახლეობა იმსახურებს. მე არ მაინტერესებს გიორგი გაბუნიას არც რელიგიური მრწამსი, არც მისი შეხედულებები, თუმცა ფაქტია, რომ მან შეურაცხყოფა მიაყენა სრულიად მარათლმადიდებლურ სამყაროს და ასევე სხვა ქრისტიანებს. ეს ფართომასშტაბიანი აქციები მივა იმ შედეგამდე, რომ "რუსთავი 2"-ის ეს ბინძური პროპაგანდა ამოიძირკვოს საქართველოში", - განაცხადა „ქართული მარშის“ წევრმა.

ორშაბათს „ქართული მარშის“ აქტივისტები სანდრო ეულის ქუჩაზე მდებარე რუსთავი 2-ის შენობასთან შეიკრიბნენ. ისინი აპროტესტებდნენ გიორგი გაბუნიას შესავალ სიტყვას, რომელშიც იესო ქრისტე იყო ნახსენები.

„ქართული მარშის“ წევრების განცხადებით, ნათქვამმა მათი რელიგიური გრძნობები შეურაცხყო.

აქციის დროს „ქართული მარშის“ წევრებმა ალყა შემოარტყეს მანქანას, რომელშიც იმყოფებოდნენ ჟურნალისტი გიორგი გაბუნია და არხის იურისტი თამთა მურადაშვილი. რუსთავი 2-ის ინფორმაციით, შეკრებილებმა მანქანა დააზიანეს, ასევე თავს დაესხნენ ჟურნალისტ დავით ერაძეს.