პოლიტიკა

„ქართულ ოცნებას“ ჰქონდა კარგი მიზეზი, ვძულდე იმის გამო, რომ ბიძინა ივანიშვილს არ მოვწონდი - პრეზიდენტი

„რატომ არის კითხვა სენსიტიური? ეს არ არის კითხვა ჩემს ყოფილ „გერლფრენდზე“ “, - ასე იხუმრა საქართველოს პრეზიდენტმა გიორგი მარგველაშვილმა „ქართული ოცნების“ თავმჯდომარის, ბიძინა ივანიშვილოს შესახებ დასმულ კითხვაზე.

საერთაშორისო კონფერენციაზე „მსოფლიო თავდაყირა - 2018“ პრეზიდენტს ჰკითხეს, არის თუ არა პრობლემა საქართველოსთვის არაფორმალური მმართველობა.

„ქართულ ოცნებას“ ჰქონდა კარგი მიზეზი, ვძულდე იმის გამო, რომ ბიძინა ივანიშვილს არ მოვწონდი. სხვა მიზეზს ვერ ვხედავ, რატომ აღმიქვამენ როგორც მტერს, თუმცა ეს ნორმალურია. ქვეყნებში პოლიტიკოსები ყოველთვის ეძებენ მიზეზებს, რომ ერთმანეთი არ მოსწონდეთ. ბიძინას არ მოვწონდი და კარგი მიზეზი ჰქონდა „ოცნებას“. თავიდან ეს რთული იყო, გამოწვევა იყო შუა გზაზეც, მაგრამ ახლა უკვე მოსაწყენია.

მე ვფიქრობ, რომ ძლიერი კი არა სუსტი პოლიტიკოსები არიან პრობლემა. სუსტები არიან პრობლემა, რომლებიც იმალებიან ძლიერი ადამიანების ზურგს უკან. მე მირჩევნია, საქართველოში იყვნენ ძლიერი ადამიანები, ძლიერი ლიდერები და პრემიერ-მინისტრები. ეს მირჩევნია სუსტ მინისტრსა და სუსტ პრემიერს, ვინც იმალება ძლიერი ადამიანის უკან. ჩვენ უნდა ვიყოთ ძლიერები და არ უნდა ვიმალებოდეთ ძლიერების ზურგს უკან“, - თქვა პრეზიდენტმა.