პოლიტიკა

„ქართულ ოცნებას“ აქვს დიდი რაოდენობით შავი ფული - რომან გოცირიძე

„ერთიანი ნაციონალური მოძრაობის“ ერთ-ერთი ლიდერი, რომან გოცირიძე გამოეხმაურა აუდიტის სამსახურის მიერ „ქართული ოცნებისა“ და „ევროპული საქართველოს“ 14 შემომწირველის დაბარებას უწყებაში. გოცირიძის ვარაუდით, მმართველ პარტიას წინასაარჩევნოდ ე.წ. „შავი ფული“ აქვს შეგროვებული.

„ბუნებრივია, კითხვები არსებობს, თუ ხელფასი არ გაქვს, საიდან მოგაქვს ეს თანხები. თუმცა, ყველაფერი არის ინდივიდუალური, შეიძლება ვინმეს მართლა დანაზოგი ჰქონდა და იმდენად ფანატიკურად არის შეყვარებული „ქართულ ოცნებაზე“, რომ შესწირა მთელი თავისი ცხოვრების დანაზოგები, რისიც არ მჯერა, მაგრამ სამართლებრივად ბუნებრივია, რომ ცოტა რთული საკითხია.

ერთი რამ ფაქტია, რომ „ქართულ ოცნებას“ აქვს შემოწირულობა რამდენჯერმე მეტი, ვიდრე ყველას ერთად აღებული და ეს მილიონები არის ძალიან მცირე. მათ აქვთ დიდი რაოდენობით შავი ფული. მაჟორიტარები ცალკე ხარჯავენ, ბიუროკრატია ცალკე ეხმაურება, ამავე დროს ვიცით, ივანიშვილს რა რესურსები გააჩნია“,-აღნიშნა გოცირიძემ.

შეგახსენებთ, აუდიტის სამსახურისთვის საეჭვო გახდა, რომ პარტიებისთვის გადაცემული თანხა აღემატება შემომწირველთა შემოსავალს.

უწყებაში უკვე მივიდა „ევროპული საქართველოს“ პოლიტსაბჭოს წევრი მარიამ რამინაშვილი.

ანა მებურიშვილი