პოლიტიკა

„ქართულ ოცნებას“ ახალქალაქში მაჟორიტარობის კანდიდატებად უცხო ქვეყნის მოქალაქეები ყავს დასახელებული -გიორგი კანდელაკი

„ევროპული საქართველოს“ წევრის გიორგი კანდელაკის ინფორმაციით, „ქართულმა ოცნებას“ ახალქალაქის #40 საარჩევნო ოლქში მაჟორიტარობის კანდიდატებად უცხო ქვეყნის მოქალაქეები ყავს დასახელებული.

როგორც კანდელაკმა ბრიფინგზე განმარტა, საუბარია სამ კანდიდატზე კარაპეტ პალოიანზე, ედუარდ ელიაზიანზე და ედიკ ბერიკიანზე.

პოლიტიკოსი იუსტიციის სამინისტროს უსწრაფეს რეაგირებისკენ მოუწოდებს, რომ სამივე კანდიდატი არჩევნებიდან მოიხსნას.

„როდესაც ადამიანი იღებს სხვა ქვეყნის მოქალაქეობას იგი ავტომატურად კარგავს საქართველოს მოქალაქეობას. საქართველოს კანონმდებლობის თვალსაზრისით, სამივე ამ კანდიდატს, რომელიც „ქართულმა ოცნებამ“ დააყენა ახალქალაქის # მე-40 საარჩევნო ოლქში მაჟორიტარებად- კარაპეტ პალოიანს, ედუარდ ელიაზიანს და ედიკ ბერიკიანს დაკარგული აქვთ დე ფაქტო საქართველოს მოქალაქეობა. რა თქმა უნდა, საქართველოს პრეზიდენტს შეუძლია, რომ მათ მიანიჭოს გამონაკლისის წესით საქართველოს მოქალაქეობა ხელახლა, მაგრამ ასევე ყველას კარგად მოეხსენება, რომ როცა aდამიანი იღებს სხვა ქვეყნის მოქალაქეობას, იგი ავტომატურად კარგავს საქართველოს მოქალაქეობას. ჩვენ მოვუწოდებთ იუსტიციის სამინისტროს, რომ მოახდინოს უსწრაფესი რეაგირება და სამივე ეს კანდიდატი მოიხსნას არჩევნებიდან“,- განაცხადა გიორგი კანდელაკმა.

მონიკა დავლიანიძე