პოლიტიკა

ქართულ მხარეს მოუწოდეს, აღარ იყოს სხვისი ინტერესების გამტარებელი და ამის მაგივრად შეეცადოს მეზობლებთან ურთიერთობების დალაგება - რუსეთის საგარეო უწყება

რუსეთის საგარეო უწყების განცხადებით, ჟენევის მოლაპარაკებების 46-ე რაუნდზე რუსეთმა და საოკუპაციო ძალებმა ხაზი გაუსვეს, რომ რეგიონული უსაფრთხოებისთვის მთავარ გამოწვევად რჩება „აშშ-სა და ნატო-ს აქტიურობა საქართველოს ტერიტორიაზე“. - ამის შესახებ ნათქვამია რუსეთის საგარეო საქმეთა სამინისტროს განცხადებაში.

რუსეთის საგარეო უწყებამ ნატო-ს გენერალური მდივნის, იენს სტოლტენბერგისა და აშშ-ის სახელწმიფო მდივნის, მაიკ პომპეოს განცხადებები საქართველოს ნატო-ში გაწევრიანების მხარდაჭერის შესახებ პროვოკაციული უწოდა.

„რუსულმა, აფხაზურმა და სამხრეთ ოსურმა დელეგაციებმა კიდევ ერთხელ ხაზი გაუსვეს, რომ რეგიონალური უსაფრთხოებისთვის მთავარ გამოწვევას წარმოადგენს აშშ-სა და ნატო-ს აქტიურობა საქართველოს ტერიტორიაზე, მათ შორის ვაშინგტონისა და თბილისის გეგმა ვაზიანის სამხედრო აეროდრომის მოდერნიზებისა და 2019 წელს მორიგი ფართომასშტაბიანი მრავალეროვნული სწავლების ჩატარების შესახებ. ქართულ მხარეს მოუწოდეს, აღარ იყოს სხვისი ინტერესების გამტარებელი და ამის მაგივრად შეეცადოს მეზობლებთან ურთიერთობების დალაგება.

პროვოკაციულად უნდა შეფასდეს ნატო-ს გენერალური მდივნისა და აშშ-ის სახელმწიფო მდივნის ბოლოდროინდელი განცხადებები საქართველოს ნატო-ში გაწევრიანების მხარდაჭერის შესახებ. ზუსტად ასეთმა უპასუხისმგებლო მესიჯებმა 2008 წლის აგვისტოში თბილისს დანაშაულებრივი სამხედრო ავანტურისკენ უბიძგა“, - ნათქვამია განცხადებაში.

რუსული მხარის მტკიცებით, ოკუპირებული აფხაზეთისა და ცხინვალის რეგიონის ე.წ. საზღვრებზე არსებული ვითარება სტაბილურია, რასაც ქართული მხარე არ დაეთანხმა.

„აფხაზეთისა და სამხრეთ ოსეთის საქართველოსთან საზღვრებზე არსებული ვითარება დისკუსიის ყველა მონაწილის მიერ (გარდა საქართველოს წარმომადგენლებისა) მთლიანობაში, აღიარებული იყო როგორც სტაბილური. საზღვრის გადაკვეთის სტატისტიკა იმაზე მეტყველებს, რომ გადაადგილების თავისუფლებასთან დაკავშირებით სერიოზული პრობლემები არ არის“, - ნთქვამია განცხადებაში.

რუსეთის საგარეო უწყების თქმით, მოლაპარაკებებზე ასევე ისუაბრეს ლუგარის სახელობის კვლევითი ცენტრის საქმიანობის შესახებ.

„ლაბორატორიაში ვიზიტის შესახებ ანონიმური საერთაშორისო ექსპერტების მიერ გამოქვეყნებული ზედაპირული დასკვნა არ ხსნის ჩვენს შეშფოთებას ამასთან დაკავშირებით, მათ შორის ბაქტერიოლოგიური იარაღის აკრძალვის კონვენციის გათვალისწინების კონტექსტში“, – წერია განცხადებაში.

რუსეთის საგარეო უწყების მტკიცებით, ჰუმანიტარული ჯგუფის მუშაობა ჩაიშალა მას შემდეგ, რაც აფხაზური და სამხრეთ ოსური დელეგაციების პოზიციის მიუხედავად, გადაწყდა იძულებით გადაადგილებული პირების პრობლემის მოსაგვარებლად თანათავმჯდომარეების მიერ შემუშავებული შესაძლო მიდგომების განხილვა.

„სოხუმი და ცხინვალი ჟენევაში აღნიშნული თემის განხილვაზე პრინციპულ უარს აცხადებენ, რადგან საქართველომ ეს საკითხი გაერო-ს გენერალური ასამბლეის დღის წესრიგში რეგულარულად შეიტანა, ხოლო ოკუპირებული რეგიონის წარმომადგენლებს გაერო-ს გენერალურ ასამბლეაში დაშვება არ აქვთ მათი მრავალი მიმართვის მიუხედავად“, - წერია განცხადებაში.

რუსული მხარის ცნობით, ჟენევის დისკუსიების მორიგი რაუნდი 2019 წლის აპრილში გაიმართება.