საზოგადოება

ქალი პოლიტიკოსები და ქალთა მოძრაობა პენიტენციური სამსახურის უფროსთან და ჯანდაცვის დეპარტამენტის ხელმძღვანელთან შეხვედრას ითხოვენ

ქალი პოლიტიკოსები და ქალთა მოძრაობა პენიტენციური სამსახურის უფროსთან და ჯანდაცვის დეპარტამენტის ხელმძღვანელთან შეხვედრას ითხოვენ.

„ჩვენ ვითხოვთ ყველა სინდისის პატიმრის და პოლიტპატიმრების განთავისუფლებას, თუმცა იძულებული გავხდით ყურადღება გაგვემახვილებინა ქალი პატიმრების, ანასტასია ზინოვკინას და ნანა სანდერის ჯანმრთელობის მდგომარეობიდან გამომდინარე, მათზე.

უკვე მივმართეთ ქალთა ციხის დირექტორს, რადგან სწორედ ისაა პასუხისმგებელი პატიმრების სიცოცხლესა და ჯანმრთელობაზე, ასევე, მივმართეთ სახალხო დამცველს, რომ გაეკეთებინა მონიტორინგი და ველოდებით მის განცხადებას. დღეს კი სპეციალური პენიტენციური სამსახურის გენერალურ დირექტორთან გიორგი პატარიძესთან და სამედიცინო დეპარტამენტის ხელმძღვანელთან მიხეილ ურთქმელიძესთან შეხვედრას ვითხოვთ ქალი პოლიტიკოსები და ქალთა მოძრაობა.

საკითხი ეხება ქალი პატიმრების ანასტასია ზინოვკინას და ნანა სანდერის სიცოცხლეს და ჯანმრთელობას, ციხეში არსებულ მდგომარეობას და მათდამი დამოკიდებულებას.

ჩვენ შეხვედრაზე ვისაუბრებთ იმ საკითხებზეც, რაზეც ჯერ საჯაროდ არ გვისაუბრია. ამიტომ ვიმედოვნებთ, რომ დღის განმავლობაში შევხვდებით”- აცხადებენ ისინი.

დღეს, თბილისში, 18:00 საათზე, პენიტენციურ სამსახურთან დაგეგმილია ანასტასია ზინოვკინასა და ნანა სანდერის მხარდასაჭერი აქცია.