პოლიტიკა

პუტინი საქართველოს ღიად ემუქრება აშშ-ის პრეზიდენტთან შეხვედრის შემდეგ, რაც ყველაზე უფრო სამწუხაროა - თორნიკე შარაშენიძე

საქართველოს სტრატეგიული ანალიზის ცენტრის (GSAC) დამფუძნებელმა თორნიკე შარაშენიძემ რუსეთის პრეზიდენტ ვლადიმერ პუტინის განცხადების შეფასებისას აღნიშნა, რომ ყველაზე სამწუხაროა, რომ პუტინი საქართველოს აშშ-ის პრეზიდენტთან დონალდ ტრამპთან შეხვედრის შემდეგ ღიად დაემუქრა.

„ჩვენ გვქონდა ბოლო რამდენიმე წელი ფორმულა, რომ მეტი საქართველო ნატო-ში და მეტი ნატო საქართველოში და როგორც ჩანს, ამის წინააღმდეგიც არის და ამას არც მალავს და პირდაპირ ღიად იმუქრება. და ღიად იმუქრება აშშ-ის პრეზიდენტთან შეხვედრის შემდეგ, რაც ყველაზე უფრო სამწუხაროა. ერთ მხარეს დგას მილიარდერი და მეორე მხარეს დგას მილიარდერიც და ძალიან გამოცდილი პოლიტიკოსიც, რომელმაც, სამწუხაროდ, ბოლო ათწლეულებია, ჯიბეში ჩაისვა ძალიან ბევრი დასავლეთში, მათ შორის ამერიკის პრეზიდენტები. ეს არის ძალიან მძიმე რეალობა და ჩვენ მომავალი ორი წელი კიდევ ძალიან რთული პერიოდი გველის, თუკი, რა თქმა უნდა, ტრამპმა არ გადახედა თავის პოლიტიკას“,-განაცხადა ექსპერტმა.

ვლადიმერ პუტინმა Fox News-თან ინტერვიუში განაცხადა, რომ მას „ნეგატიური რეაქცია“ ექნება, თუკი საქართველო და უკრაინა ნატო-ს წევრები გახდებიან.

„ჩვენთვის ეს არის პირდაპირი და მყისიერი საფრთხე ჩვენი ეროვნული უსაფრთხოებისთვის... ნატო-ს ინფრასტრუქტურის ჩვენს საზღვრებთან მოახლოება იქნება საფრთხე და რეაქცია იქნება უკიდურესად ნეგატიური“, – განაცხადა პუტინმა.