პოლიტიკა

პროპორციული საარჩევნო სისტემა ჩვენი ქვეყნის მომავალი განვითარებისთვის გაცილებით უკეთესია - მამუკა მდინარაძე

საპარლამენტო უმრავლესობის წევრის, მამუკა მდინარაძის განცხადებით, დღეს რამდენიმე შეხვედრა გაიმართება, ერთ-ერთი მათგანი ფრაქცია „ქართული ოცნების“ წევრებთან.

მდინარაძის თქმით, ისაუბრებენ შერეულ და პროპორციულ საარჩევნო სისტემებზე.

დეპუტატის თქმით, გუნდში არანაირი დაპირისპირება არ არსებობს და ფრაქციის წევრები საკამათო საკითხზე შეთანხმებას მიაღწევენ.

„დღეში არაერთი შეხვედრა გვაქვს. მათ შორის ფრაქციის წევრებთან და უმრავლესობასთან. დღეს, რამდენიმე შეხვედრა შედგება. მათ შორის საუბარი იქნება შერეულ და პროპორციულ საარჩევნო სისტემაზე. ამასთან დაკავშირებით, სიტყვა - დაპირისპირების გამოყენება ინტერპრეტირებად მიმაჩნია, რადგან არანაირი დაპირისპირება არ არსებობს. ყველანი მეგობრები, თანაგუნდელები ვართ, უბრალოდ, განსხვავებულ აზრზე ვართ და ამ თემაზე ვკამათობთ და საბოლოო ჯამში საერთო შეთანხმებას მივაღწევთ", - განაცხადა მდინარაძემ.

მდინარაძის თქმით, ქვეყნის განვითარებისთვის პროპორციული საარჩევნო სისტემაა ყველაზე მისაღები.

„ჩემი აზრით, პროპორციული საარჩევნო სისტემა ჩვენი ქვეყნის მომავალი განვითარებისთვის გაცილებით უკეთესია, მაგრამ არის დეპუტატების გარკვეული ჯგუფი, რომელიც ასე არ ფიქრობს“, - განაცხადა მდინარაძემ.

ანა მებურიშვილი