სამართალი

პროკურატურაც დარწმუნდა, რომ შემოწირულობის 100 პროცენტი იხარჯებოდა და ახლაც იხარჯება ქველმოქმედებაზე - პაატა ბურჭულაძე

თბილისის საქალაქო სასამართლოში საქველმოქმედო ფონდ „იავნანას“ დამფუძნებლის, პაატა ბურჭულაძის გამოკითხვა დასრულდა.

როგორც ბურჭულაძემ დაკითხვის შემდეგ განაცხადა, კმაყოფილია, რომ ეს შეხვედრა შედგა, რადგან პირველ რიგში, ეს ფონდის ინტერესებშია.

„ცოტა ხანში ალბათ დადებენ დასკვნას და ეს საქმე დაიხურება, რადგან ეს არის იმდენად თითიდან გამოწოვილი საქმე, რომ მეუხერხულებოდა კიდეც ზოგიერთ კითხვაზე პასუხის გაცემა. თუმცა ყველა კითხვას გავეცი პასუხი. ბატონი მოსამართლე და გამომძიებელი დარწმუნდნენ, რომ ეს ბრალი უსაფუძვლოა“, – განაცხადა ბურჭულაძემ.

მსოფლიო ბანმა აბსურდი უწოდა ბრალდებებს, რომ ფონდის მიერ ნაყიდი სახლები საცხოვრებლად უვარგისია. მისი თქმით, სასამართლოში გამოკითხვისას ეს შეკითხვა არც დასმულა.

„რადგან ყველამ იცოდა იქ, რომ ფონდი არა მარტო თვითონ ირჩევდა სახლს, არამედ იმ ოჯახისა და სოციალური მუშაკის თანხმობით, ასევე გამგეობისა და ჩვენი ფონდის წარმომადგენლების. თავიდან ჩვენ ვუფორმებდით სახლს პირდაპირ ოჯახს გაყიდვის უფლებით. ამას ის მოყვა, რომ პირველმა ოჯახებმა გაყიდეს და ბავშვები დარჩნენ ქუჩაში. ამის შემდეგ შევცვალეთ მიდგომა და 10 წლის ვადით ვუფორმებდით ოჯახს სახლებს, მაგრამ გაყიდვა არ შეეძლო. 10 წელი გავიდა, რამდენიმე ოჯახმა გაყიდა. ახლა ჩვენ პირობაში ასეთი რამე გვაქვს: ოჯახს ეკუთვნის სახლი, ოღონდ სანამ ყველაზე უმცროსი ბავშვი არ გახდება სრულწლოვანი, მას გაყიდვის უფლება არ აქვს და მგონი ეს არის აბსოლუტურად სწორი“, – განაცხადა პაატა ბურჭულაძემ.

მისი თქმით, ასევე დეზინფორმაციაა ინტერნეტში გავრცელებული ფილმი, სადაც საუბარია, რომ ბავშვებს შემოწირულობების 20 თუ 30 პროცენტი ხმარდებოდა.

„ამაში დარწმუნდა პროკურატურაც, რომ შემოწირულობის 100 პროცენტი იხარჯებოდა და ახლაც იხარჯება ქველმოქმედებაზე“, – აღნიშნა ფონდ „იავნანას“ დამფუძნებელმა.

მისივე თქმით, ფონდზე შეტევები მის გამო ხდება და ამას წყალი არ გაუვა.