სამართალი

პროკურატურაში არ ადასტურებენ, რომ დავით სესიაშვილის შესაძლო მონაწილეობით საქმეზე მათ უწყებაში წარმოება მიმდინარეობს

ნაციონალური მოძრაობის მიერ გავრცელებულ ინფორმაციას საპარლამენტო უმრავლესობის წევრის, ლიდერის, ირაკლი სესიაშვილის შვილის ქურდობაში შესაძლო მონაწილეობასთან დაკავშირებით, პროკურატურა გამოეხმაურა.

საგამოძიებო უწყებაში განმარტავენ, რომ საქმე, რომელზეც ოპოზიციური პარტია საუბრობს, მათ წარმოებაში საერთოდ არ ჰქონიათ.

შეგახსენებთ, რომ ნაციონალური მოძრაობის პოლიტსაბჭოს წვევრის კოტე იოსელიანის განცხადებით, თბილისში მომხდარ ქურდობის ფაქტზე აღძრული სისხლის სამართლის საქმე, რომელშიც მმართველი გუნდის წევრის, ირაკლი სესიაშვილის ვაჟი, დავით სესიაშვილი ფიგურირებს, დღემდე გამოუძიებელია.

როგორც იოსელიანმა დღეს გამართულ ბრიფნგზე განაცხადა, დანაშულის ადგილზე ჩატარებული ოპერატიული საგამოძიებო მოქმედებების შედეგად, საექსპერტო კრიმინალურმა სამსახურმა ნივთმკიცების სახით ამოიღო სავარაუდო დამნაშავის ხელის ანაბეჭდები, რომელიც ექსპერტიზის ბიურომ ვარგისად ცნო და დარეგისტრირდა სამძებრო სამსახურის ბაზაში.

,,მიმდინარე წელს საქართველოს მოქალაქემ სუს-ს მუშაობის დაწყების სურვილით მიმართა, სპეციალური პროცედურების გავლის შემეგ, რაც სუს-ში მუშაობის დაწყებას სჭირდება, დაქტილოსკოპიის ანალიზმა გამოავლინა, რომ მოქალაქის ანაბეჭდის ნიმუშები ჩადენილი დანაშაულის ადგილიდან ამოღებული ანაბეჭდების იდენტურია. ჩვენი ინფორმაციით, ამ მონაცემების თანხვედრის შესახებ საქმის კურსში იყო გომელაურის და გოგაშვილის უწყება, მიუხედავად ამისა, რეაგირება არ მომხდარა. პროკურატურამ კი ირაკლი შოთაძის ჩარევით, ეს საქმე საერთოდ მიჩქმალა. საუბარი ეხება მოქალაქეს, რომელიც გახლავთ პარლამენტის წევრის, თავდაცვისა და უშიშროების კომიტეტის თავმჯდომარის, ნდობის ჯგუფის ხელმძღვანელის, ,,ქართული ოცნების’’ ერთ-ერთი ლიდერის, ირაკლი სესიაშვილის შვილს, დავით სესიაშვილს," - განაცხადა კოტე იოსელიანმა.

ნინო ექვთიმიშვილი