სამართალი

პროკურატურამ უნდა შეისწავლოს, რატომ და რის საფუძველზე გააჟღერა ეს ინფორმაცია ბორის კაკუბავამ - ხორავას ქუჩაზე მოკლული მოზარდის, დავით სარალიძის მამა

ხორავას ქუჩაზე მოკლული მოზარდის, დავით სარალიძის მამამ, ზაზა სარალიძემ მიმართა პროკურატურას განცხადებით, რომ უწყებამ ბორის კაკუბავას მიერ გაკეთებულ განცხადებებზე რეაგირება მოახდინოს. კერძოდ, სარალიძემ მოითხოვა, გამოიძიოს კაკუბავას მიერ გაჟღერებული ინფორმაციის სისწორე და თუ ის არ დადასტურდა, განცხადებას შესაბამისი სამართლებრივი შეფასება მიეცეს.

„ბორის კაკუბავამ გააჟღერა ასეთი ინფორმაცია, რომ მის შვილიშვილებს აშანტაჟებდნენ, ტუალეტში აყოფინებდნენ თავს და აწერდნენ ფულს. რადგან არასრულწლოვნებს ასე ძლიერად იცავს საქართველოს კანონმდებლობა, მოვითხოვ ჩემი შვილის, ლევანისა და მათი მეგობრების უფლებებიც იყოს დაცული. შეისწავლონ, რატომ და რის საფუძველზე გააჟღერა ეს ინფორმაცია და თუ სიმართლეს არ შეესაბამება, მიეცეს სამართლებრივი შეფასება. თავდასხმა თავდაცვის ყველაზე საუკეთესო საშუალებაა, რაც ამ წუთში ჩემი აზრით, ბორის კაკუბავამ გამოიყენა“, - თქვა სარალიძემ.

კაკუბავა სისხლიანი გარჩევის ერთ-ერთი მონაწილის ბაბუაა. ყოფილი დეპუტატი ხორავას ქუჩაზე დატრიალებულ ტრაგედიას საზღვარგარეთიდან გამოეხმაურა და რუსთავი 2-თან განაცხადა, რომ სისხლიან დაპირისპირებას წინ კონკრეტული კონფლიქტი უძღოდა. მისივე ცნობით, მის შვილიშვილს ჩაგრავდნენ და ფულს ართმევდნენ.