სამართალი

პროკურატურამ `თიბისი ბანკის` გენერალური დირექტორი გამოკითხა

პროკურატურის წარმომადგენლებმა მოწმის სტატუსით გამოკითხეს „თიბისი ბანკის" გენერალური დირექტორი ვახტანგ ბუცხრიკიძე.

გენერალურ პროკურატურაში აცხადებენ, რომ ბუცხრიკიძე 18 მარტს გამოიკითხა თბილისის საქალაქო სასამართლოში, მაგისტრი მოსამართლის თანდასწრებით.

"ეს ეხებოდა, როგორც მოგეხსენებათ, იმ 12 წლის წინანდელ ფაქტთან დაკავშირებულ მოვლენებს და ამომწურავი ინფორმაცია გადავეცი. მოგეხსენებათ, 3 კვირის წინ TBC ბანკსა და ეროვნულ ბანკს შორის მოხდა შეთანხმება, ამოწურულია ეს საკითხი. ბანკი აგრძელებს ჩვეულებრივად მუშაობას და დეტალურ კითხვებზე გავეცით პასუხი,"- ამბობს ბუცხრიკიძე რუსთავი 2-ის "კურიერის" ჟურნალისტის შეკითხვების პასუხად.

ჟურნალისტის კითხვაზე, პროკურატურამ ჰკითხა თუ არა TBC ბანკის დამფუძნებლის, მამუკა ხაზარაძისთვის, გაგზავნილ მუქარის შემცველ წერილზე, პასუხობს, რომ არა, "ამასთან კავშირი არ ჰქონია". კიდევ ერთ შეკითხვაზე, ხაზარაძის განცხადებამდე ჰქონდა თუ არა მას ამ წერილის შესახებ ინფორმაცია, ბუცხრიკიძე პასუხს არ სცემს.

შეგახსენებთ, საქართველოს პროკურატურა უკანონო შემოსავლის ლეგალიზაციის მუხლით 2018 წლის აგვისტოდან იძიებს „თიბისი ბანკში“ 2008 წელს განხორციელებულ ერთ-ერთ ფინანსურ ოპერაციას.

საქმეში ფიგურირებენ ბანკის თანადამფუძნებლები მამუკა ხაზარაძე და ბადრი ჯაფარიძე, თუმცა, მათ ბრალდებულის სტატუსი არ აქვთ და გამომძიებლების მიერ მოწმის სტატუსით არიან დაკითხულნი.