პოლიტიკა

პროკურატურამ დაადგინოს, მოსყიდული ჰყავს თუ არა ბიძინა ივანიშვილს მთავრობის წევრები - ლევან ხაბეიშვილი

თბილისის საკრებულოს ფრაქცია „ერთიანი ნაციონალური მოძრაობის“ წევრმა, ლევან ხაბეიშვილმა მოუწოდა პროკურატურას, შეისწავლოს მმართველი გუნდის მოქმედი და ყოფილი თანამდებობის პირების დეკლარაციებში არსებული შეუსაბამობები.

საკრებულოს დეპუტატის თქმით, ბიძინა ივანიშვილი მთავრობის წევრებს დამატებით ანაზღაურებას აძლევს, რის სანაცვლოდ მინისტრები მას ემორჩილებიან.

„ამ ქვეყნის მთავარი მძარცველი, როგორც ჩანს, მისი მოურავების კეთილგანწყობას ყიდულობს და საბოლოო ჯამში, შემდეგ აღმოვაჩენთ ხოლმე, რომ მაგალითად, კულტურის მინისტრი ხელს უწერს, საყდრისის აფეთქებაზე. მაგალითად, ეკონომიკის მინისტრი ხელს უწერს 2 მილიონ ნახევარი კვადრატული მეტრის ლარით გადაცემაზე მის დეიდაშვილს. შემდეგ აღმოვაჩენთ, რომ კვირიკაშვილი ყველაფერზე ხელის მომწერია. ჩვენ გვინახავს მისი მოსყიდული პროკურატურა.

დღეს პროკურატურას მივმართავთ ძალიან მარტივი განცხადებით, რომელიც უბრალოდ საჭიროებს კითხვებზე პასუხების გაცემას. როგორ მოხდა, რომ ასი ათასობით ლარის აცდენა აქვს შემოსავალსა და გასავალში კვირიკაშვილსა და ქუმსიშვილს. როგორც მოხდა, რომ როცა პროკურორი ფარცხალაძე გადადგა თანამდებობიდან , ფაქტობრივად ერთ დღეში ეს კაცი გახდა მილიონერი და დღეს საჯარო რეესტრში შეგიძლიათ, მოიძიოთ მისი ქონება, ისაა დეკლარირებული მილიონერი.

გვაქვს კითხვები ზარდიაშვილთან დაკავშირებით, რომელიც სასამართლოს მიმართულებით აქტიურობს ხოლმე და საზოგადოებას უნახავს, როგორ ერევა, მათ შორის სასამართლო უწყებაში ზარდიაშვილი. ეს კაცი „ქართული ოცნების“ წევრობიდან ფაქტობრივად მილიონერი გახდა, 2012 წლამდე შეგიძლიათ ნახოთ მაგისი დეკლარაცია , 2012 წლის შემდეგ გეომეტრიული პროგრესიით იზრდება, რომლის საშუალებასაც მისი შემოსავალი, რა თქმა უნდა, არ იძლევა. ამიტომ მნიშვნელოვანია პროკურატურამ დაიწყოს გამოძიება და დაადგინოს, მოსყიდული ჰყავს თუ არა ბიძინა ივანიშვილს მთავრობის წევრები“, - განაცხადა ხაბეიშვილმა.

ცნობისთვის, „შაბათის კურიერმა“ საქართველოს მთავრობაში არსებულ საიდუმლო ფონდთან დაკავშირებით ინფორმაცია გაავრცელა. სანდო წყაროს ცნობით, ამ ფონდიდან მინისტრთა კაბინეტის რჩეულებს ათი ათასობით ლარს უხდიან.