პოლიტიკა

პროკურატურა ოთარ ფარცხალაძის ჩვენების გამოქვეყნებას არ გეგმავს

ბიზნესის სავარაუდო რეკეტის საქმესა და სკანდალურ ფარულ ჩანაწერებზე დაწყებული გამოძიების ფარგლებში ყოფილი მთავარი პროკურორი ოთარ ფარცხალაძე გამოკითხეს. თუმცა პროკურატურა მისი ჩვენების გასაჯაროებას არ გეგმავს.

კითხვაზე, რატომ არ ქვეყნდება ფარცხალაძის ჩვენება, როცა თავის დროზე იმავე საქმეზე პროკურატურამ გაასაჯაროვა სპორტისა და ახალგაზრდობის ყოფილი მინისტრის, ლევან ყიფიანის ჩვენება, მთავარი პროკურორის მოადგილემ, გიორგი გოგაძემ უპასუხა, რომ ამაზე ვერ ისაუბრებს გამოძიების ინტერესებიდან გამომდინარე.

„გამოძიების ინტერესებიდან გამომდინარე, ამ დეტალებზე ვერ გეტყვით“, -უპასუხა გოგაძემ ჟურნალისტებს.

გოგაძის ინფორმაციით, ორი კვირის წინ თბილისში უცხოელი პროკურორები იმყოფებოდნენ, რომლებმაც ჩანაწერების საქმეზე იმუშავეს.

„გამოძიების ინტერესებიდან გამომდინარე ვერ გეტყვით, რა ეტაპზე ვართ. ფარცხალაძე, რომ დაკითხულია ამ საქმეში, თქვენ დიდი ხნის წინ ტელევიზიით იხილეთ“, - უთხრა გოგაძემ ჟურნალისტებს.