სამართალი

პროკურატურა ე.წ ციანიდს საქმის პროცესის დახურვას ითხოვს

პროკურატურა, ე.წ ციანიდის საქმის პროცესის დახურვას ითხოვს.

როგორც მედიას საქმის პროკურორმა ზვიად გუბელაძემ დღევანდელი პროცესის დაწყების წინ, თბილისის საქალაქო სასამართლოსთან განუცხადა, არსებობს მართლმსაჯულებისთვის ხელის შეშლის საფრთხეები.
მისი თქმით, საქმეში მოიპოვება დეკანოზ გიორგი მამალაძის პირადი ცხოვრების ამსახველი ინფორმაცია, რაც ბრალდების აზრით, საჯარო არ უნდა გახდეს.

„წინასასამართლო სხდომაზე არსებობდა მართლმსაჯულებისთვის ხელის შეშლის საფრთხეები, პროცესის მონაწილეების უსაფრთხოებისთვის საფრთხის შექმნა. ყველასთვის ცნობილია, რომ გამოყენებულია დაცვის სპეციალური ღონისძიებაც კი. გარდა ამისა, საქმეში მოიპოვება ბრალდებულის პირადი ცხოვრების ამსახველი ინფორმაცია, რომელიც მიგვაჩნია, რომ საჯარო არ უნდა გახდეს. ეს საფრთხეები დღესდღეობით ისევ არსებობს“,-აღნიშნა პროკურორმა.

დეკანოზ გიორგი მამალაძის ადვოკატს გიორგი ფანცულაიას კი მიაჩნია, რომ პროცესის დახურვის მოთხოვნის მიზეზი არის ის, რომ ბრალდების მხარეს „დასამალი აქვს ბევრი რამე“.

„ჩვენ მიგვაჩნია, რომ სასამართლო აუცილებლად უნდა იყოს ღია, რათა მიეცეს ადგილობრივ, თუ საერთაშორისო დამკვირვებლებს, საზოგადოებას, ჟურნალისტებს უფლება დაესწრონ და ჩაატარონ მონიტორინგი, რომლის ინტერესი ნამდვილად დიდია. დაესწრონ და მიიღონ ინფორმაცია არა მხარეებისგან , არამედ ნეიტრალური მხარიდან. მათ დასამალი აქვთ ძალიან ბევრი და ჩვენ გვინდა, რომ საზოგადოებამ გაიგოს სწორედ სასამართლოდან, თუ რისი დამალვას ცდილობენ დღემდე“,-აღნიშნა ფანცულაიამ.

მონიკა დავლიანიძე