სამართალი

პროკურატურა „ბირჟა მაფიის“ წევრების დაკავებასთან დაკავშირებულ გარემოებებს შეისწავლის

საქართველოს პროკურატურა ბრალდებულების დაკავებასთან დაკავშირებულ გარემოებებს შეისწავლის და მაქსიმალურად შემჭიდროებულ ვადებში მოხდება მათი გამოკითხვა, რის შემდეგაც საქმეზე მიღებული იქნება შესაბამისი სამართლებრივი გადაწყვეტილება, - განუცხადეს საზოგადოებრივ მაუწყებელს „ბირჟა მაფიის“ წევრების დაკავების საქმესთან დაკავშირებით საქართველოს პროკურატურაში.

თბილისის საქალაქო სასამართლომ გუშინვე აღკვეთის ღონისძიების სახით „ბირჟა მაფიას“ რეპერებს პატიმრობა შეუფარდა.

შსს-ს ინფორმაციით, გამოძიება მათ განსაკუთრებით დიდი ოდენობით ნარკოტიკული საშუალების უკანონო შეძენა-შენახვას ედავება.

ამ თემაზე დღეს სახალხო დამცველმაც გაავრცელა განცხადება, სადაც უჩა ნანუაშვილი აღნიშნავს,

რომ ამ მიმართულებით საქართველოს პროკურატურის მიერ გამოძიების დაუყოვნებლივ დაწყება და მისი დროულად, სრულყოფილად და ობიექტურად წარმოება ძალიან მნიშვნელოვანია.