პოლიტიკა

პრეზიდენტს ვენეციის კომისიის წინასწარი დასკვნა მიღებული არ აქვს - ანა დოლიძე

პრეზიდენტის საპარლამენტო მდივნის, ანა დოლიძის თქმით, პრეზიდენტს ვენეციის კომისიის წინასწარი დასკვნა არ მიუღია. - ასე უპასუხა დოლიძემ საქართველოს პარლამენტის თავმჯდომარის, ირაკლი კობახიძის განცხადებას, რომ აღნიშნული დოკუმენტი პარლამენტის ხელმძღვანელობამ და საქართველოს პრეზიდენტმა მიიღეს.

დოლიძემ კობახიძეს მოუწოდა, უსაფუძვლო ბრალდებებისგან თავი შეიკავოს.

„მერჩივნა, პირდაპირ მესაუბრა ამ ძალიან მნიშვნელოვანი დოკუმენტის შინაარსზე და არ მქონოდა სამწუხარო ვალდებულება, რომ მიმეთითებინა პარლამენტის თავმჯდომარისთვის, უსაფუძვლო ბრალდებაზე პრეზიდენტის მიმართ. პრეზიდენტს ეს დოკუმენტი მიღებული არ აქვს. ნებისმიერი ინსინუაცია, რაც ახსენა პარლამენტის თავმჯდომარემ, საფუძველს მოკლებულია. არ მინდა ვინმემ იგრძნოს თავი, როგორც აგატა კრისტის „მკვლელობა აღმოსავლეთის ექსპრესში“, სადაც ვიღაცა მოკვდა და ყველანი დავდივართ და ვეძებთ ვინ არის მკვლელი“,- განაცხადა დოლიძემ იურიდიულ საკითხთა კომიტეტის სხდომაზე.

როგორც დღეს ირაკლი კობახიძემ განაცხადა, მიუხედავად იმისა, რომ ვენეციის კომისიის წინასწარი დასკვნა მხოლოდ პარლამენტის ხელმძღვანელობასა და პრეზიდენტს ჰქონდა, დოკუმენტმა მედიაში გაჟონა. მისი თქმით, კომისიის მოთხოვნა იყო, დოკუმენტი არ გასაჯაროვებულიყო.

ანა მებურიშვილი