პოლიტიკა

პრეზიდენტმა თავისი განცხადებით შეურაცხყოფა მიაყენა საკონსტიტუციო კომისიას - ირაკლი სესიაშვილი

საპარლამენტო უმრავლესობის წევრი, ირაკლი სესიაშვილი პრეზიდენტის განცხადებას ეხმაურება, რომელშიც ქვეყნის პირველმა პირმა გააკრიტიკა საკონსტიტუციო კომისიის მუშაობა პრეზიდენტის არჩევის წესთან დაკავშირებით.

სესიაშვილის განცხადებით, კომისიაში შეთანხმებული არიან, რომ შემდეგი საპრეზიდენტო არჩევნები პირდაპირი წესით ჩატარდება.

„კომისიაში მეტ-ნაკლებად ვთანხმდებით, რომ შემდეგი არჩევნები იყოს პირდაპირი წესით, ხოლო მაგის შემდეგი საპრეზიდენტო არჩევნები არაპირდაპირი წესით დაინიშნოს. სწორედ იმიტომ მოხდა ეს ყველაფერი, რომ ბატონ გიორგი მარგველაშვილს არ დაეწყო პოლიტიკური სპეკულაციები“, - განაცხადა სესიაშვილმა.

სესიაშვილმა პრეზიდენტის განცხადება სპეკულაციად შეაფასა.

„პრეზიდენტს ერთგვარად ეწყინა კიდევაც, რომ ჩვენ მხარს არ ვუჭერთ იმ მიდგომას, რომ მომავალი საპრეზიდენტო არჩევნები გაიმართოს არაპირდაპირი წესით, და ეს მოლოდინი რომ არ გაუმართლა, მაინც სპეკულააციის გზით წავიდა, რაც სამწუხაროა“, - განაცხადა სესიაშვილმა ჟურნალისტებთან საუბრისას.

მისი თქმით, პრეზიდენტმა თავისი კრიტიკული განცხადებით „შეურაცხყოფა მიაყენა მთლიანად კომისიას“.

შეგახსენებთ, რომ გუშინდელ საგანგებო ბრიფინგზე საქართველოს პრეზიდენტმა გიორგი მარგველაშვილმა შეაფასა პარლამენტის თავმჯდომარის განცხადება, რომლის თანახმად, საკონსტიტუციო კომისია პრეზიდენტის არჩევის ორსაფეხურიან წესზე მსჯელობს.

მარგველაშვილის თქმით, აღნიშნული საკითხის განხილვის მოტივაცია არის „არა კონსტიტუციის შინაარსობრივი გადახედვა, არამედ ამ კონკრეტულ პოლიტიკოსთან დაკავშირებული შეხედულებები“.

ანა მებურისვილი