პოლიტიკა

პრეზიდენტმა ე.წ. მოსმენების კანონს ვეტო დაადო

საქართველოს პრეზიდენტმა, გიორგი მარგველაშვილმა პარლამენტის მიერ დამტკიცებულ ე.წ. მოსმენების კანონს ვეტო დაადო. ამის შესახებ მან დღევანდელ ბრიფინგზე განაცხადა.

პრეზიდენტის განცხადებით, კანონში გამოიკვეთა ორი ხარვეზი, რომელიც ეხება ფარული მოსმენების განმახორციელებელი სააგენტოს დამოუკიდებლობასა და სატელეკომუნიკაციო კომპანიებზე დაკისრებულ ხარჯებს.

„პაკეტში არის რიგი საკამათო საკითხები, თუმცა კონსულტაციებისა და ჩვენი მუშაობის შედეგად ძირითადში გამოიკვეთა ორი ხარვეზი. პირველი არის სააგენტოს დამოუკიდებლობა, რომელიც წარმოდგენილი კანონპროექტით არ არის უზრუნველყოფილი, შესაბამისად, ეწინააღმდეგება საკონსტიტუციო სასამართლოს გადაწყვეტილებას, მეორე არის კანოპროექტში გაუმართლებელი და არაპროგნოზირებადი ხარჯები, რომელიც ეს კანონპროექტი საკომუნიკაციო კომპანიებს აკისრებს“, - განაცხადა პრეზიდენტმა.

გიორგი მარგველაშვილმა ასევე კომენტარი გააკეთა მმართველი გუნდის წევრების ნათქვამზე, რომ ვეტოს აუცილებლად დაძლევენ. პრეზიდენტმა მოუწოდა „ქართულ ოცნებას“, გაითვალისწინოს მისი მოტივირებული შენიშვნები.

„ახლა მინდა მივმართო საპარლამენტო უმრავლეოსობას, რადგან მე არაერთხელ გავიგე განცხადებები, იმის თაობაზე, რომ ეს ვეტოც დაიძლევა. პატივცემულო ბატონებო, ვიცი, რომ საკონსტიტუციო უმრავლესობა გაგაჩნიათ, ამის შესახებ ინფორმირებულია ქართული საზოგადოება. ყველამ იცის, რომ ვეტო დაძლევადია, მაგრამ ამ ვეტოს წერის პროცესში მანამ, სანამ კანონპროექტი იქნებოდა მიღებული, ჩვენ ვაწარმოებდით კონსულტაციებს, როგორც არასამთავრობო სექტორთან, ისე პოლიტიკურ პარტიებთან, ასევე ამ სფეროში ჩართულ კომპანიებთან. ვეტოს წერის პროცესშიც მოგიწოდებდით, რომ ჩვენთან გქონოდათ კონსულტაციები, იცით რა, რომ ჩვენ გვჯერა, რომ „ქართულ ოცნებას“ შეუძლია ამ ვეტოს დაძლევა, მაგრამ შესაძლებელია, ახლა დადგა დრო, რომ ყველამ დავიჯეროთ, რომ ვეტო დაძლევადია და დავიწყოთ მუშაობა, რომ უკეთესი კანონები შევქმნათ იმ ფონზე, როდესაც გვესმის ყველას, რომ ვეტო დაძლევადია. მაგრამ შესაძლებელია, დრო დადგა, ჩავუღრმავდეთ ამ კანონპროექტს, ჩვენს შენიშვნებს და ვეტოს დაძლევის დემონსტრირების მაგივრად, საქართველოს მივცეთ უკეთესი კანონმდებლობა,“- განაცხადა გიორგი მარგველაშვილმა.

შეგახსენებთ, რომ 1-ლ მარტს პარლამენტმა მესამე მოსმენით მხარი დაუჭირა უმრავლესობის მიერ შემუშავებულ საკონსტიტუციო ცვლილებათა პაკეტს ე.წ. ფარული მოსმენების შესახებ. აღნიშნულ კანონპროექტზე მუშაობა მას შემდეგ გახდა საჭირო, რაც 2016 წლის 14 აპრილს საკონსტიტუციო სასამართლომ ფარული მოსმენების არსებული წესი არაკონსტიტუციურად ცნო. სასამართლომ პარლამენტს დააკისრა ცვლილებების შეტანის ვალდებულება 2017 წლის 31 მარტამდე.

ანა მებურიშვილი