პოლიტიკა

პრეზიდენტმა ბოდიში უნდა მოიხადოს თავისი მოხელის გადაცდომის გამო - მამუკა მდინარაძე

„წესით, პრეზიდენტმა ბოდიში უნდა მოიხადოს თავისი მოხელის გადაცდომის გამო, რომელმაც პარლამენტის თავმჯდომარე და დიპლომატიური კორპუსი შეურაცხყო“, - ასე გამოეხმაურა საპარლამენტო ფრაქცია „ქართული ოცნების“ თავმჯდომარე, მამუკა მდინარაძე საგარეო საკითხებში პრეზიდენტის მრჩევლის თენგიზ ფხალაძის განცხადებას. ფხალაძის თქმით, დღეს ამბასადორიალზე სიტყვით გამოსვლისას პარლამენტის თავმჯდომარემ ირაკლი კობახიძემ ელჩებს „პარტიული დავალებები“ მისცა, რაც დაუშვებელია.

მამუკა მდინარაძის თქმით, ირაკლი კობახიძეს რამე პარტიული დავალებები არ გაუცია დიპლომატიური კორპუსისთვის.

„ალბათ, ოპოზიციურ ფრთაზე მიკერძოებული უნდა იყო, რომ ირაკლი კობახიძის განცხადებებში პარტიული დავალებები ამოიკითხო. ეს უკვე ინტერპრეტირების აქამდე ცნობილ ფარგლებსაც კი სცილდება. გარდა ამისა, პრეზიდენტის ადმინისტრაციის მოხელის ეს განცხადება შეურაცხყოფას აყენებს, როგორც საქართველოს პარლამენტის თავმჯდომარეს, ასევე, მთლიანად დიპლომატიურ კორპუსს, რომელსაც პრეზიდენტის მხარე პარტიულ აქტივად მოიხსენიებს. სწორედ ამის გამო, წესით, პრეზიდენტმა ბოდიში უნდა მოიხადოს თავისი მოხელის გადაცდომის გამო, რომელმაც პარლამენტის თავმჯდომარე და დიპლომატიური კორპუსი შეურაცხყო“, - განაცხადა მდინარაძემ.