პოლიტიკა

პრეზიდენტმა ანა დოლიძე იუსტიციის საბჭოს არამოსამართლე წევრად დანიშნა

საქართველოს პრეზიდენტმა, გიორგი მარგველაშვილმა ანა დოლიძე იუსტიციის საბჭოს არამოსამართლე წევრად დანიშნა.

როგორც მარგველაშვილმა პრეზიდენტის სასახლეში გამართულ ბრიფინგზე განაცხადა, 2012 წელს, ხელისუფლების ცვლილების დროს, ყველას ჰქონდა მოლოდინი, რომ მართლმსაჯულების სისტემა თვისობრივად გაუმჯობესდებოდა.

„ დღეს შეიძლება ითქვას, რომ საზოგადოების ნდობა ზოგადად მართლმსაჯულების მიმართ, სამწუხაროდ, ბევრ კითხვას ვერ პასუხობს. არადა, დამოუკიდებელი სასამართლო არის ერთ-ერთი მთავარი ფუნდამენტი ჩვენი სახელმწიფოებრიობის. ის არა მარტო უზრუნველყოფს ჩვენი მოქალაქეების სამართლებრივ დაცულობას, არამედ არის ერთ-ერთი უმნიშვნელოვანესი გარანტი ჩვენი სახელმწიფოს ბალანსისა და გაწონასწორების მექანიზმების, ანუ დემოკრატიული სახელმწიფოს და სამართლებრივი სახელმწიფოს ეფექტიანი ფუნქციონირების. ხოლო იუსტიციის უმაღლესი საბჭო არის ერთ-ერთი იმ ორგანოთაგანი, რომელსაც თავისი მანდატით ევალება უზრუნველყოს მართლმსაჯულების სისტემის დამოუკიდებლობა და ეფექტიანი ფუნქციონირება“, – განაცხადა გიორგი მარგველაშვილმა.

მისი თქმით, მართლმსაჯულების სისტემაში საკანონმდებლო ბაზა ჯერ კიდევ დასახვეწია და მნიშვნელოვანია ამ სისტემაში მონაწილე ადამიანების როლიც.

„ამ ადამიანებით შენდება უკეთესი სამართლებრივი სისტემა. სწორედ ამიტომ ჩემი გადაწყვეტილება დავნიშნო ამ მაღალ და უაღრესად საპასუხისმგებლო თანამდებობაზე ანა დოლიძე, არის განმტკიცებული იმით, რაზეც ორი წუთის წინ ვილაპარაკე.

ბევრი წლის განმავლობაში ქალბატონი ანა ამტკიცებდა თავის უნარს, იყოს უაღრესად კვალიფიციური, მამაცი და ქვეყნის ღირებულებების და უზენაესი ღირებულებების იურისტი. ამით არის განმტკიცებული ჩემი გადაწყვეტილება მისი დანიშვნის შესახებ“, – განაცხადა საქართველოს პრეზიდენტმა.

გიორგი მარგველაშვილმა ანა დოლიძეს წარმატება უსურვა მნიშვნელოვან და ამავე დროს საპასუხისმგებლო საქმეში, უზრუნველყოფს უფრო მაღალი ხარისხის მართლმსაჯულების სისტემის აღმშენებლობა და გაძლიერება საქართველოში.

ანა დოლიძე იუსტიციის უმაღლესი საბჭოს არამოსამართლე წევრის თანამდებობაზე ვახტანგ მჭედლიშვილს შეცვლის, რომელსაც 4-წლიანი უფლებამოსილების ვადა 16 იანვარს ეწურება.

ანა დოლიძე ამ დრომდე პრეზიდენტის საპარლამენტო მდივნის თანამდებობას იკავებდა.