პოლიტიკა

პრეზიდენტმა 10 ოქტომბრამდე უნდა გადაწყვიტოს, აწერს თუ არა ხელს საკონსტიტუციო ცვლილებებს - ეკა ბესელია

პარლამენტის იურიდიულ საკითხთა კომიტეტის თავმჯდომარის, ეკა ბესელიას განცხადებით, პრეზიდენტმა 10 ოქტომბრამდე უნდა გადაწყვიტოს, დაამტკიცებს თუ არა ის ახალ კონსტიტუციას.

„10 ოქტომბრამდე აქვს პრეზიდენტს ვადა იმისთვის, რომ გადაწყვიტოს, აწერს ხელს საკონსტიტუციო ცვლილებებს თუ არა და ველოდებით ამ გადაწყვეტილებას“, -თქვა ბესელიამ.

დეპუტატის თქმით, პარლამენტის შემდგომი ნაბიჯები პრეზიდენტის გადაწყვეტილებაზე იქნება დამოკიდებული.

„ველოდებით ამ შეხვედრის შედეგებს. რა გადაწყვეტილებას მიიღებს პრეზიდენტი, ამაზეა დამოკიდებული ჩვენი შემდგომი გადაწყვეტილება ცვლილებებთან დაკავშირებით. მე ვფიქრობ, რომ ჩვენი მხრიდან ძალიან გონივრული შეთავაზება იყო გაკეთებული. ველოდებით პრეზიდენტის გადაწყვეტილებას. თუ ვსაუბრობთ სახელმწიფოებრივი ინტერესიდან გამომდინარე გადაწყვეტილებაზე, ვფიქრობთ, ჩვენ კიდევ ერთი ნაბიჯი გადავდგით კომპრომისისა და შეთანხმებისკენ“, -თქვა ბესელიამ.

შეგახსენებთ, გუშინ პრეზიდენტის სასახლეში ქვეყნის პირველი პირი გიორგი მარგველაშვილი საპარლამენტო უმრავლესობის 7-კაციან დელეგაციას შეხვდა საკონსტიტუციო ცვლილებებზე სალაპარაკოდ. კერძოდ, განიხილებოდა პარლამენტის თავმჯდომარის, ირაკლი კობახიძის შეთავაზება, რომლის მიხედვით, პრეზიდენტმა ვეტო უნდა დაადოს ორ საკონსტიტუციო ცვლილებას. ერთ-ერთი მათგანი ეხება ბონუსის მექანიზმის გაუქმებას, ხოლო მეორე 2020 წლის საპარლამენტო არჩევნებისთვის ერთჯერადად ბლოკების შესაძლებლობის დატოვებას.

ახალი კონსტიტუცია საქართველოს პარლამენტმა 26 სექტემბერს მიიღო.

ანა მებურიშვილი