პოლიტიკა

პრეზიდენტისგან შემოთავაზებას ველოდებით - ირაკლი კობახიძე

საქართველოს პარლამენტის თავმჯდომარის, ირაკლი კობახიძის განცხადებით, პრეზიდენტის სურვილის შემთხვევაში მმართველი გუნდი შეხვდება მას კონსტიტუციაზე სალაპარაკოდ. ამის შესახებ მან ჟურნალისტებს უთხრა.

„პირადად მე მზადყოფნა გამოვხატე, რომ მისი სურვილის შემთხვევაში, საკონსტუტიციო საკითხებთან დაკავშირებით შევხვდებოდი, თუმცა ჯერჯერობით დუმილია. შეხვედრისთვის მზადყოფნა გამოვხატეთ და ვეტოს უფლება პრეზიდენტის უფლებაა. შესაბამისად, შეხვედრის გამართვა საჭიროდ მან უნდა ჩათვალოს. საუბარი არ არის იმაზე, ამას მე ვიზამ თუ ის. მისი უფლებაა ვეტოს გამოყენება და შესაბამისად, ინიციატივის გამოყენება მის მხარესაა. შეხვედრის ჩატარება მან უნდა შემოგვთავაზოს, თუკი ის შედეგზე ორიენტირებული იქნება. თუკი მისი მხრიდან შეთავაზება იქნება, ჩვენი პასუხი პოზიტიური იქნება. ასეთ შემოთავაზებას ველოდებით. შემოთავაზება კონკრეტული უნდა იყოს და უნდა ვიცოდეთ, სად, როდის და რაზე ვხვდებით“, -თქვა კობახიძემ.

შეგახსენებთ, კონსტიტუციის მიღების შემდეგ პარლამენტის თავმჯდომარემ, ირაკლი კობახიძემ შესთავაზა პრეზიდენტ გიორგი მარგველაშვილს, ვეტო დაადოს ორ საკონსტიტუციო ცვლილებას. ერთ-ერთი მათგანი ეხება ბონუსის მექანიზმის გაუქმებას, ხოლო მეორე 2020 წლის საპარლამენტო არჩევნებისთვის ერთჯერადად ბლოკების შესაძლებლობის დატოვებას. მან აღნიშნა, რომ ამ საკითხზე სალაპარაკოდ მზადაა, ქვეყნის პირველ პირს შეხვდეს.

28 სექტემბერს პრეზიდენტი ოპოზიციის წარმომადგენლებს შეხვდა და განაცხადა, რომ უმრავლესობის სურვილის შემთხვევაში, ის შეხვდება მმართველ გუნდს.

ახალი კონსტიტუცია საქართველოს პარლამენტმა 26 სექტემბერს მიიღო.

ანა მებურიშვილი