პოლიტიკა

პრეზიდენტის ვეტოს დაძლევა არ უნდა გაგვიჭირდეს - დავით მათიკაშვილი

დღეს სასამართლო რეფორმის მესამე ტალღასთან დაკავშირებით გასამართ პლენარულ სხდომაზე უმრავლესობა პრეზიდენტის მიერ დადებული ვეტოს დაძლევას აპირებს, ასევე არ გაიზიარებს გიორგი მარგველაშვილის მოტივირებულ შენიშვნებს.

როგორც „ქართული ოცნების“ წევრი დავით მათიკაშვილი ამბობს, ვეტოს დაძლევა მმართველ გუნდს არ გაუჭირდება.

„სრულყოფა ამით არ მთავრდება და მომავალშიც შესაძლებელია, რომ გარკვეული ცვლილება შევიდეს, ამიტომ ამ კანონის მიღების გაჭიანურება იქნება ძალიან ცუდი, როგორც სასამართლოს რეფორმის კუთხით, ასევე საზოგადოებისთვის. ასე რომ, მაღალი ალბათობით, ვეტოს დაძლევა ჩვენ არ გაგვიჭირდება“, - ამბობს მათიკაშვილი.

ფრაქცია „მოძრაობა თავისუფლებისთვის-ევროპული საქართველოს“ წევრის, გიორგი ტუღუიშის თქმით, საპარლამენტო უმრავლესობას უნდა გაეზიარებინა პრეზიდენტის მოტივირებული შენიშვნები სასამართლო რეფორმასთან დაკავშირებით.

„რომ დაძლევენ ამ ვეტოს, ამაში ეჭვი არავის არ ეპარება, არც არასდროს არ გვეპარებოდა, როცა მათ ჯერ კიდევ ერთი თვის წინ განაცხადეს, რომ დაძლევდნენ. თუმცა, კაი იქნებოდა, რომ გაეზიარებინათ ეს შენიშვნები, რათა რამდენიმე თვეში არ გახდეს კიდევ იგივე კანონზე მუშაობა ახლიდან დასაწყები“, - ამბობს ტუღუში.

ვეტოს დასაძლევად 76 დეპუტატის მხარდაჭერაა საჭირო.

შეგახსენებთ, რომ 24 იანვარს საქართველოს პრეზიდენტმა გიორგი მარგველაშვილმა ვეტო დაადო „საერთო სასამართლოების შესახებ“ მომზადებული საკანონმდებლო ცვლილებათა პაკეტს.

პლენარულ სესიამდე პრეზიდენტი ამ კანონზე მსჯელობის ფარგლებში გამართა მოლაპარაკებები როგორც ოპოზიციის წარმომადგენლებთან, ასევე არასამათავრობო სექტორთან. რაც შეეხება „ქართული ოცნების“ წარმომადგენლებს, მათ უარი თქვეს სასამართლო რეფორმის მესამე ტალღასთან დაკავშირებულ მსჯელობაში მონაწილეობაზე.

ანა მებურიშვილი