პოლიტიკა

პრეზიდენტის შეფასებით, ახალი კონსტიტუციით ქვეყანა ყალიბდება ფსევდოსაპარლამენტო რესპუბლიკად - ეკა მიშველაძე

პრეზიდენტის შეფასებით, ახალი კონსტიტუცია არ უწყობს ხელს სახელისუფლებო შტოებს შორის ბალანსის დაცვას. ამის შესახებ პრეზიდენტის პრესსპიკერმა, ეკა მიშველაძემ განაცხადა სამშაბათის ტრადიციულ ბრიფინგზე.

პრეზიდენტის აზრით, პოლიტიკური ბლოკების შექმნის აკრძალვა, 5%-იანი ბარიერის შენარჩუნება და გადაუნაწილებელი მანდატების მხოლოდ გამარჯვებული პარტიისთვის გადაცემა ასუსტებს როგორც პარლამენტს, ასევე პოლიტიკურ პარტიებს.

„მმართველი პოლიტიკური ძალის მიერ საპარლამენტო მმართველობის ფორმაზე გადასვლა, ყოველგვარი განხილვის გარეშე გამოცხადდა. საკონსტიტუციო კომისიამ პროექტი საზოგადოების ჩართულობის გარეშე შეიმუშავა, მას გაემიჯნა ყველა პოლიტიკური პარტია, ექსპერტებისა და არასამთავრობოების უმრავლესობა, უარყოფითად შეაფასა სახალხო დამცველმა. დოკუმენტისთვის კენჭისყრა კი, გაუგებარი პოლიტიკური და სამართლებრივი გადაწყვეტილებით - კომისიის წევრთა შემადგენლობის შეცვლის შედეგად მოხერხდა. რაც შეეხება პრეზიდენტის შეფასებას - პრეზიდენტის აზრით, კონსტიტუციის ახალი ვერსია არ უწყობს ხელს ხელისუფლების შტოებს შორის ბალანსისა და გაწონასწორების პოლიტიკას. შემოთავაზებულ მოდელში ბლოკების შექმნის აკრძალვით და ამ ფონზე 5%-იანი ბარიერის შენარჩუნებით, გამარჯვებული პარტიის მიერ გადაუნაწილებელი ხმების სრულიად უსამართლო მითვისებით, რეალურად ყალიბდება არაკონკურენტული საარჩევნო სისტემა, რაც მომავალში მრავლპარტიული პარლამენტის შექმნის შესაძლებლობას კრიტიკულად ამცირებს, ხალხის განწყობის პროპორციულად ასახვას არ უზრუნველყოფს, საბოლოოდ კი, ქვეყანა ყალიბდება ფსევდოსაპარალამენტო რესპუბლიკად, სადაც იმის ნაცვლად, რომ პარტიები და პარლამენტი იყოს ძლიერი, ორივე შესუსტებულია“, - განაცხადა მიშველაძემ.

მიშველაძის თქმით, საპარლამენტო რესპუბლიკისთვის დამახასიათებელი ორპალატიანი პარლამენტის სისტემაც არაა უზრუნველყოფილი.

პრესსპიკერმა ასევე ისაუბრა, რატომ არ ჩაერთო პრეზიდენტი საკონსტიტუციო კომისიის საქმიანობაში. მიშველაძის თქმით, მმართველმა გუნდმა უარი თქვა პრეზიდენტის შეთავაზებაზე, საკონსტიტუციო ცვლილებებზე მუშაობა წარმართულიყო მაღალი პოლიტიკური კონსესუსითა და საზოგადოების ფართო ჩართულობით.

ანა მებურიშვილი