პოლიტიკა

პრეზიდენტის რეზიდენცია იქნება მზად - ანზორ ჩუბინიძე

სახელმწიფო დაცვის სპეციალური სამსახურის ხელმძღვანელის, ანზორ ჩუბინიძის განცხადებით, ინაუგურაციის შემდგომ პრეზიდენტის ათონელის რეზიდენცია მზად იქნება, თუმცა ტექნიკური სამუშაოები შესაძლოა, სრულად არ იყოს დასრულებული.

რაც შეეხება იმას, რომ უკვე გარემონტებულ რეზიდენციას ხელახლა დასჭირდა რემონტი, ჩუბინიძემ უპასუხა, რომ „ეს იყო კოსმეტიკური რემონტი“. ჩუბინიძის მტკიცებით, ის რემონტისთვის გამოყოფილ ხარჯებზე დეტალურ ინფორმაციას არ ფლობს.

„თანხები ზეპირად ზუსტად არ ვიცი. ნამდვილად არ მახსოვს. ვფიქრობ, რომ გარკვეული ეტაპისთვის პრეზიდენტის რეზიდენცია იქნება მზად, რომ პრეზიდენტი შევიდეს და იმუშაოს, თუმცა, ალბათ, ტექნიკური სამუშაოები შესაძლოა, იყოს კვლავ გასაკეთებელი. ვფიქრობ, განწყობა ისეთია, მიუხედავად ყველაფრისა, არ არის იმის აუცილებლობა, რომ რაღაც დავაჩქაროთ და სიჩქარეში რაიმე გაფუჭდეს, პრეზიდენტი შევა და მას მუშაობის საშუალება ექნება, თუმცა შესაძლებელია, რაიმე ტექნიკური სამუშაო გაგრძელდეს“, - განაცხადა ჩუბინიძემ.

მისივე თქმით, ამ დროისთვის სახელმწიფო დაცვის სპეციალური სამსახური უკვე იცავს რეზიდენციას.

ცნობისთვის, ახალარჩეული პრეზიდენტი სალომე ზურაბიშვილი ავლაბრის რეზიდენციის ნაცვლად ათონელის რეზიდენციაში იმუშავებს.