პოლიტიკა

პრეზიდენტის მხრიდან მცდელობაა, საზოგადოების ყურადღება სხვა სივრცეში გადაიტანოს - დავით მათიკაშვილი

საპარლამენტო უმრავლესობის წევრის, დავით მათიკაშვილის განცხადებით, პრეზიდენტის ადმინისტრაციის უფროსის, გიორგი აბაშიშვილის განცხადების მიზანი იყო შეწყალების თემიდან ყურადღების გადატანა სხვა საკითხზე.

„პარლამენტის წევრები ვართ, პარლამენტში ვმუშაობთ და რაღაც საკითხებზე შეიძლება ინტერესთა თანხვედრა იყოს, მაგრამ ქვეყნის დოქტრინული ხედვა რადიკალურად განსხვავებულია და ვერანაირ ხედვაზე საუბარი ვერ იქნება. „ქართულ ოცნებას“ არანაირი დახმარება არ სჭირდება, რომ საკონსტიტუციო უმრავლესობა ჰყავდეს. პრეზიდენტის მხრიდან მცდელობაა, საზოგადოების ყურადღება სხვა სივრცეში გადაიტანოს. სჯობს, პრეზიდენტმა და მისმა ადმინისტრაციამ იმ საკითხებზე იმსჯელონ, რაც საზოგადოებას ძალიან აწუხებს. თუნდაც ეს შეწყალებას ეხება“, – უთხრა დეპუტატმა ჟურნალისტებს.

გიორგი აბაშიშვილმა განაცხადა, რომ „საქართველოს პარლამენტში ,,ევროპული საქართველოსა“ და ,,ქართული ოცნების“ მონაწილეობით, ახალი საკონსტიტუციო უმრავლესობის ფორმირების პროცესი მიმდინარეობს და ძალიან სამწუხაროა, რომ ამ უმრავლესობის მთავარი გამაერთიანებელი დღეს საქართველოს პრეზიდენტის წინააღმდეგ ბინძური კამპანიის წარმოებაა“. ოპოზიციისა და უმრავლესობის კრიტიკა იმ ფაქტმა განაპირობა, რომ პრეზიდენტის მიერ შეწყალებულმა ვეფხია ბაქრაძემ, რომელიც სასჯელს იხდიდა ოჯახის წევრისთვის მიყენებული ჯანმრთელობის მძიმე დაზიანებისთვის, 13 აპრილს, ბარნოვის ქუჩაზე საკუთარი გერი მოკლა.