პოლიტიკა

პრეზიდენტის მიერ გიორგი გიორგანაშვილის შეწყალება ნარკოპოლიტიკის სისტემურ პრობლემას ვერ გამოასწორებს - ანა ნაცვლიშვილი

„შეიწყალოს საქართველოს პრეზიდენტმა მსახიობი გიორგი გიორგანაშვილი(ბახალა)“- ამ სახის პეტიცია გავრცელდა საიტ manifest.ge-ზე. ამ დროისთვის პრეზიდენტისადმი მიმართვას 1297-მა ადამიანმა მოაწერა ხელი.

პეტიციას გიორგი გიორგანაშვილის შეწყალების თაობაზე გამოეხმაურა პრეზიდენტის საპარლამენტო მდივანი ანა ნაცვლიშვილი. მისი თქმით, კონკრეტულ შემთხვევაზე მიღებული გადაწყვეტილება ქვეყანაში ნარკოპოლიტიკას ვერ გამოასწორებს.

„კონკრეტულ შემთხვევასთან დაკავშირებით პრეზიდენტი მიიღებს გადაწყვეტილებას, რადგან ეს მისი პრეროგატივაა, მაგრამ ერთ კონკრეტულ შემთხვევაზე მიღებული გადაწყვეტილება სისტემურ პრობლემას ვერ გამოასწორებს. აქ არ არის საუბარი ერთ ადამიანზე, რომელიც გახდა ამ რეპრესიული ნარკოპოლიტიკის მსხვერპლი. აქ საუბარია ათობით და ასობით მოქალაქეზე. ბევრი ადამიანი, რომელიც არ არის ცნობილი, მაგრამ არის ამ ქვეყნის მოქალაქე, ძალიან მძიმე მდგომარეობაშია არსებული ნარკოპოლიტიკის პირობებში. ამიტომ ამას სჭირდება სისტემური რეფორმა და ფრაგმენტული ჩარევები პრობლემას ვერ მოაგვარებს“, -თქვა ნაცვლიშვილმა.

გუშინ თბილისის საქალაქო სასამართლოს მოსამართლემ შორენა გუნცაძემ მსახიობ გიორგი გიორგანაშვილს, იმავე „ბახალას“, 8 წლით თავისუფლების აღკვეთა მიუსაჯა.

გიორგანაშვილს ბრალი განსაკუთრებით დიდი ოდენობით ნარკოტიკული საშუალების პირადი მოხმარების მიზნით შეძენა-შენახვაში ედებოდა.