პოლიტიკა

პრეზიდენტის გამოსვლა ბრალდებებით დაიწყო - ეკა ბესელია

საპარლამენტო უმრავლესობის წევრი ეკა ბესელია პრეზიდენტის საპარლამენტო გამოსვლას გამოეხმაურა. მისი განცხადებით, იმის მიუხედავად, რომ პრეზიდენტი მუდამ დიალოგისკენ მოუწოდებს მმართველ გუნდს, მისი გამოსვლა ბრალდებას უფრო ჰგავდა.

ბესელიას თქმით, პრეზიდენტი წარდგა, როგორც მხარე და არა ნეიტრალური არბიტრი.

„პრეზიდენტის გამოსვლის დასაწყისი იყო ბრალდების შემცველი. მგონია, რომ შეცდომა იყო, როდესაც პრეზიდენტმა გამოსვლა ასე დაიწყო, განსაკუთრებით იმ ფონზე, როცა მმართველ გუნდს მოუწოდებს, რომ მეტი დიალოგი ჰქონდეს, დიალოგის მოსურნე პრეზიდენტს კი უნდა ჰქონდეს მეტი კონსტრუქციული ტონი. ჩვენ კრიტიკა არ გვაფრთხობს, არ ველოდით, რომ პრეზიდენტის მხრიდან იქნებოდა ქება-დიდება, მაგრამ არ არის სასურველი, როდესაც პრეზიდენტი, რეალურად, როგორც მხარე, ისე ელაპარაკება პარლამენტს და არა როგორც ნეიტრალური არბიტრი“, - განაცხადა ეკა ბესელიამ.

ბესელიას შეფასებით, პრეზიდენტი ოპოზიციის მხარეს დადგა.

„ის თავად ინაცვლებს იმ სივრცეში, საიდანაც გვესაუბრება, ის გასცდა მიუკერძოებელი არბიტრის სივრცეს. ის საუბრობს დღეს ზუსტად იმ ტერმინოლოგიით და შინაარსით, როგორითაც საუბრობს დღეს ოპოზიცია“, - განაცხადა უმრავლესობის წევრმა.

ბესელია ასევე არ დაეთანხმა პრეზიდენტის განცხადების იმ ნაწილს, რომლის მიხედვით, უმრავლესობამ დიალოგზე უარი თქვა. ბესელიას განმარტებით, მმართველი გუნდი ყოველთვის იწვევს პრეზიდენტის ადმინისტრაციის წარმომადგენლებს, რაც მათი ღიაობის ნიშანია.

„თუ პრეზიდენტი ჩაკეტილობას ეძახის იმას, რომ ფორმალური დიალოგი არის მხოლოდ იმიტომ, რომ ამ დიალოგს მოჰყვეს ეგრევე ვეტოს დადება, რა თქმა უნდა, ასეთი დიალოგი აზრს კარგავს. ჩვენ ყველა სამუშაო პროცესში ვიწვევთ მის წარმომადგენლებს. ეს ნიშნავს, რომ გახსნილია თანამშრომლობის სივრცე, მაგრამ, სამწუხაროდ, ჩვენ ვხედავთ მისი მხრიდან მხოლოდ ვეტოების დახუნძლულ სტატისტიკას“,- განაცხადა ბესელიამ.

ბესელიამ იმ თემებზე გაამახვილა ყურადღება, რომლის მოსმენას ისურვებდა პრეზიდენტის გამოსვლაში.
„მე დამაკლდა უსაფრტხოების საკითხები, სისტემური რეფორმების გამოყოფა, დამაკლდა საქართველოს მიღწევები ბოლო 4 წელში, რა სწრაფი დინამიკა აქვს და როგორ გადაინაცვლა კრიზისული ვითარებიდან რეგიონის ლიდერობამდე და ამის შეფასება იყო ზუსტად უვიზო მიმოსვლა“, - განაცხადა ბესელიამ.

ანა მებურიშვილი