პოლიტიკა

პრეზიდენტის ფუნქციებთან დაკავშირებით ვენეციის კომისიისგან რამე შენიშვნა არ იქნება - მამუკა მდინარაძე

ფრაქცია „ქართული ოცნების“ თავმჯდომარის მამუკა მდინარაძის შეფასებით, ვენეციის კომისიას რამე სახის შენიშვნა არ ექნება პრეზიდენტის უფლებამოსილებებთან დაკავშირებით.

როგორც მდინარაძემ თქვა, კონსტიტუციის ახალ რედაქციაში პრეზიდენტს ისეთი ფუნქციებიც აქვს, რაც არ შეესაბამება საპარლამენტო სახელმწიფოს მოდელს.

„რამე სახის შენიშვნები პრეზიდენტის უფლებამოსილებასთან, მის ფუნქციებთან დაკავშირებით არ გამოთქმულა ვენეციის კომისიის ექსპერტების მიერ. იყო გარკვეული შენიშვნა, რომ პირიქით, რამდენიმე ფუნქცია ამ მოწყობის სახელმწიფოში, კონსტიტუციურად საპარლამენტო სახელმწიფოში არ უნდა ჰქონდეს პრეზიდენტს და ამასთან დაკავშირებით იყო მცირე დისკუსია. საერთო ჯამში, პრეზიდენტთან მიმართებაში ვენეციის კომისიის ექსპერტებს რაიმე კრიტიკული ან რაიმე სახის შენიშვნა არ ექნებათ“,- განაცხადა მდინარაძემ.

მდინარაძემ აღნიშნა, რომ შენიშვნა იყო პრეზიდენტის მიერ მოქალაქეობის მინიჭების უფლებაზე. კერძოდ, იმაზე გაამახვილეს ყურადრება, რომ მსგავსი პრაქტიკა წმინდა საპარლამენტო რესპუბლიკაში არ არსებობს.

შეგახსენებთ, ბერლინში მეორე დღეა მიმდინარეობს საკონსტიტუციო განხილვა. საქართველოს პარლამენტის თავმჯდომარე ირაკლი კობახიძე ვენეციის კომისიასა და საერთაშორისო არასამთავრობო ორგანიზაციებს საკონსტიტუციო ცვლილებებს აცნობს.

ვენეციის კომისიის დასკვნა 16 ივნისს გახდება ცნობილი.

ანა მებურიშვილი