პოლიტიკა

პრეზიდენტის არჩევის წესი და მოდელი უნდა იყოს მისი ფუნქციების, უფლებამოსილებებისა და მისი პოლიტიკური როლის შესაბამისი - არჩილ თალაკვაძე

საპარლამენტიო უმარვლესობის წევრმა არჩილ თალაკვაძემ კომენტარი გააკეთა პრეზიდენტის უფლებამოსილების შესაძლო შემცირებასთან დაკავშირებით.

თალაკვაძის თქმით, პრეზიდენტის არჩევის წესი და მოდელი უნდა იყოს მისი ფუნქციების, უფლებამოსილებებისა და მისი პოლიტიკური როლის შესაბამისი.

„ჩვენ კი არ ვიხრებით საპარლამენტო მოდელისკენ, არამედ ეს მოდელი უკვე რეალურად გვაქვს ქვეყანაში. ამიტომ ბუნებრივია, საკონსტიტუციო ცვლილებების პროცესში და რეფორმაში აისახება და კიდევ უფრო გაძლიერდება ინსტიტუციურად ეს მოდელი. შესაბამისად, ცვლილებები, რომელსაც ჩვენ განვიხილავთ, ბუნებრივია, ამ მოდელზეა მორგებული და საპარლამენტო მოდელის გრძელვადიან შემდგომ განმტკიცებაზე“, - ამბობს თალაკვაძე.

კონსტიტუციონალისტის, ვახუშტის მენაბდის თქმით, პრეზიდენტის პირდაპირი არჩევის წესი უფრო მისაღებია არსებული საპარლამენტო მოწყობის გათვალისწინებით.

„რა თქმა უნდა, არ არსებობს უნივერსალური მოდელი პრეზიდენტის არჩევის წესის. ეს დამოკიდებულია ბევრ სხვა საკითხზე. კონსტიტუციაში, მე პირადად ვფიქრობ, რომ ერთპალატიანი პარლამენტის პირობებში და უნიკალური ტერიტორიული მოწყობის გათვალისწინებით ძალიან კრიტიკულები უნდა ვიყოთ პრეზიდენტის ირიბი წესით არჩევის მიმართ“, - ამბობს მენაბდე.

შეგახსენებთ, რომ ახლა საპარლამენტო კომისიის თემატური ჯგუფის სხდომა მიმდინარეობს, სადაც ერთ-ერთი მთავარი განსახილველი თემაა პრეზიდენტისა და მთავრობის უფლებამოსილებების გამიჯვნა.

ანა მებურიშვილი