პოლიტიკა

პრეზიდენტის ადმინისტრაციაში ე.წ. მოსმენების გასაღებთან დაკავშირებით `ეს შენ გეხებას` წარმომადგენლებთან შეხვედრა მიმდინარეობს

პრეზიდენტის საპარლამენტო მდივანი ანა დოლიძე და უშიშროების საბჭოს მდივნის მოადგილე ლევან ბოძაშვილი პრეზიდენტის სასახლეში კამპანია "ეს შენ გეხებას" წევრი არასამთავრობო ორგანიზაციების წარმომადგენლებს ხვდებიან.

მხარეები ფარულ საგამოძიებო მოქმედებებთან დაკავშირებული საკანონმდებლო პაკეტზე მსჯელობენ.
შეხვედრა საქართველოს პრეზიდენტის ადმინისტრაციის მიერ ფარულ საგამოძიებო მოქმედებებთან დაკავშირებული საკანონმდებლო პაკეტის შესწავლის ფარგლებში იმართება. დღესვე, ამავე საკითხზე, პრეზიდენტის სასახლეში ფიჭური კავშირგაბმულობის კომპანიების წარმომადგენლებთანაც გაიმართება შეხვედრა.

არასამთავრობო ორგანიზაციების წარმომადგენლები არ იზიარებენ ე.წ. მოსმენების შესახებ კანონპროექტის იმ ნაწილს, რომელიც მოსმენების გასაღები სუს-ის დაქვემდებარებაში მყოფ უწყებაში დარჩენას ითვალისწინებს. ისინი მოითხოვენ, რომ ე.წ. გასაღების გადასაცემად დამოუკიდებელი ორგანო შეიქმნას და არა სუს-ის სსიპ-ი. არასამთავრობო სექტორში აცხადებენ, რომ ნებისმიერი ადამიანის პირად ინფორმაციაზე სახელმწიფო უსაფრთხოების სამსახურს წვდომა არ უნდა ჰქონდეს, რადგან ორგანო პროფესიულად დაინტერესებულია რაც შეიძლება მეტი ინფორმაცია მოიპოვოს.

ნინო ექვთიმიშვილი