პოლიტიკა

პრეზიდენტი საზოგადოების მიმართ სრულ უპატივცემულობას იჩენს, როცა საკუთარი გეგმების შესახებ არ ეუბნება - გიგა ბოკერია

„ევროპული საქართველოს“ ერთ-ერთმა ლიდერმა, გიგა ბოკერიამ მოუწოდა საქართველოს პრეზიდენტ, გიორგი მარგველაშვილს, დროულად გაასაჯაროვოს თავისი გადაწყვეტილება საპრეზიდენტო არჩევნებში მონაწილეობის შესახებ. დეპუტატმა მარგველაშვილს ურჩია, არ ამოეფაროს პარტიებთან მიმართებით ინტრიგებზე მსჯელობას.

ბოკერიამ პრეზიდენტის გუშინდელი განცხადების შეფასებისას თქვა, რომ მეორეხარისხოვანია პრეზიდენტის მსჯელობა, მან ვის რა შანსი მისცა და სახელისუფლებო ან ოპოზიციურ კანდიდატებზე რას ფიქრობს.

„ეს მეორეხარისხოვანი საკითხია. პრეზიდენტობა პასუხისმგებლობაა ამომრჩევლისა და საზოგადოების წინაშე. მოქმედი პრეზიდენტისგან იმის დროზე თქმა, იყრის თუ არა კენჭს, მინიმალური პატივისცემაა ამომრჩევლისა და საზოგადოების მიმართ. ვწუხვარ, რომ პრეზიდენტი გაუგებარ ინტრიგებზე საუბრით იმის გადაფარვას ცდილობს, რომ საზოგადოების მიმართ სრულ უპატივცემულობას იჩენს, როცა საზოგადოებას საკუთარი გეგმების შესახებ არ ეუბნება. საზოგადოებას უნდა უპასუხოს, ასე რატომ იქცევა. რას ფიქრობს ხელისუფლებასა და ოპოზიციაზე, ეს ცალკე საკითხია და არ მაინტერესებს. საუბარია, ელემენტარულ პოლიტიკურ პატივისცემაზე საკუთარი მოქალაქეების მიმართ, რაც პრეზიდენტს ამომრჩევლის მიმართ ევალება“, – თქვა ბოკერიამ.

ბოკერიას შეფასებით, პრეზიდენტს სწორება უნდა ჰქონდეს ამომრჩეველსა და საზოგაოდებაზე და არა „ქართული ოცნების“ თავმჯდომარე ბიძინა ივანიშვილსა და ოპოზიციაზე.

დეპუტატმა აღნიშნა, რომ პრეზიდენტმა საპრეზიდენტო არჩევნებში მონაწილეობაზე „საზოგადოებას დროზე უნდა უთხრას და არა, ბოლო წამს, რაღაც გაუგებარი ინტრიგების გამო“.

გუშინ სამოქალაქო საზოგადოებასთან შეხვედრაზე საქართველოს პრეზიდენტმა კითხვაზე, იქნება თუ არა საპრეზიდენტო კანდიდატი, განაცხადა, რომ პასუხის არგაცემით სამსახურს გაუწევს პოლიტიკურ ელიტას, როგორც მმართველ „ქართულ ოცნებას“, ასევე ოპოზიციას.

მარგველაშვილმა თქვა, რომ აღნიშნულ კითხვაზე დადებითი პასუხის შემთხვევაში „ქართული ოცნება“ უფრო ძლიერ კანდიდატს წარადგენს, ხოლო უარყოფითი პასუხისას - უფრო სუსტს.

ანა მებურიშვილი