პოლიტიკა

პრეზიდენტი ოპოზიციონერ ლიდერად ევლინება ქვეყანას, რაც მიუღებელია- დავით მათიკაშვილი

საპარლამენტო უმრავლესობის წევრის, დავით მათიკაშვილის შეფასებით, პრეზიდენტის მიერ უარის თქმა „მაუწყებლობის შესახებ“ კანონპროექტზე ადასტურებს, რომ ის ოპოზიციონერი ლიდერია.

„კონსტიტუციით, როცა პრეზიდენტი კანონპროექტს ხელს არ აწერს, დოკუმენტზე ხელმოწერა პარლამენტის თავმჯდომარეს მოუწევს. პრეზიდენტის სულისკვეთება კიდევ ერთხელ დასტურდება, რადგან ქვეყანას ისე ევლინება, როგორც ოპოზიციონერი ლიდერი, რაც მიუღებელია. ეს გადაწყვეტილება ხელს იმ ჯანსაღ და კარგ რეგულაციებს ვერ შეუშლის, რომელიც კანონპროექტით გათვალისწინებულია. მიღებული კანონპროექტი მედიასივრცის გაჯანსაღებისკენ გადადგმული ნაბიჯი იქნება. ეს მხოლოდ საზოგადოებრივი მაუწყებლის მხარდაჭერა არ არის. ეს მთლიანად მედიასივრცის მხარდაჭერაა.

მედიაორგანიზაციების პოზიცია საერთაშორისო პრაქტიკასა და ევროპის მაუწყებელთა კავშირის პოზიციას არ ემთხვევა, სადაც ცალსახად მითითებულია, რომ ამ კანონმდებლობით დაგეგმილი ცვლილებები თანხვედრაშია საუკეთესო ევროპულ პრაქტიკასთან”,-თქვა მათიკაშვილმა.

ცნობისთვის, პრეზიდენტის საპარლამენტო მდივანმა ანა ნაცვლიშვილმა განაცხადა, რომ გიორგი მარგველაშვილი აღნიშნულ კანონპროექტს ხელს არ აწერს.

21 თებერვალს პარლამენტმა „მაუწყებლობის შესახებ“ საკანონმდებლო პაკეტზე პრეზიდენტ გიორგი მარგველაშვილის მიერ დადებული ვეტო დაძლია.

ანა მებურიშვილი